بھارت میں آئی فون 12 کا آرڈر کرنے والے شخص کو برتن دھونے کا صابن اور 5 روپے کا سکہ بھیج دیا گیا۔
بھارتی میڈیا رپورٹ کے مطابق کیرالہ کے رہائشی نورالامین نے 12 اکتوبر کو ایمیزون پر 70 ہزار 900 روپے مالیت کا موبائل فون آرڈر کیا اور اپنے ایمیزون پے کارڈ کے ذریعے ادائیگی کی۔
نور الامین کو 15 اکتوبر کو باکس موصول ہوا اس نے ڈیلیوری بوائے کے سامنے ایک دن باکس کھولا اور ویڈیو بنانے کا فیصلہ کیا، باکس کھولنے پر اسے ایک برتن دھونے کا صابن اور پانچ روپے کا سکہ ملا۔
بھارتی شہری نے سائبر پولیس کو واقعے کی رپورٹ درج کروائی اور مقدمہ درج کروادیا۔
پولیس نے فون کے کور پر موجود نمبر سے تفتیش کی اور بتایا کہ امین کو جو فون ملنا تھا وہ ستمبر سے جھارکھنڈ میں کوئی استعمال کررہا تھا۔
پولیس کے مطابق ہم نے ایمیزون حکام سے رابطہ کیا یہ فون رواں سال 25 ستمبر سے جھارکھنڈ میں کوئی استعمال کررہا ہے، حالانکہ آرڈر صرف اکتوبر میں دیا گیا تھا۔
پولیس کا کہنا تھا کہ جب ہم نے بیچنے والے سے رابطہ کیا تو اس نے کہا کہ فون اسٹاک سے باہر ہے اور نورالامین کی طرف سے ادا کی گئی رقم واپس کردی جائے گی۔
رپورٹ کے مطابق بعدازاں نور الامین کو آئی فون 12 کے لیے دی گئی رقم واپس کردی گئی تھی۔
