دبئی: متحدہ عرب امارات کی ریاست دبئی کے لگژری ہوٹل میں جھگڑے کے دوران شوہر نے مکا مار کر بیوی کی ناک توڑ ڈالی۔
غیرملکی خبررساں ادارے کی رپورٹ کے مطابق متحدہ عرب امارات کی ریاست دبئی میں شوہر نے جھگڑے کے دوران مکا مار کر بیوی کی ناک توڑ ڈالی اور اہلیہ کی گردن دبا کر اس کا سر دروازے پر دے مارا، پولیس نے ملزم کو گرفتار کرکے عدالت میں پیش کردیا۔
دبئی کے سرکاری استغاثہ کے مطابق 23 اگست 2018 کو 29 سالہ اماراتی شخص نے اپنی اہلیہ کے ساتھ جارحانہ رویہ اختیار کرتے ہوئے اس کی پٹائی کی اور اسے زخمی کردیا جس میں اس کے دائیں پاؤں میں شدید چوٹیں آئیں اور ناک بھی ٹوٹ گئی۔
البشرا پولیس اسٹیشن میں واقعے کی ایف آئی آر درج کرائی گئی، ایف آئی آر کے متن کے مطابق خاتون نے شوہر پر الزام عائد کیا کہ اس نے ہوٹل میں اسے بہیمانہ تشدد کا نشانہ بنایا اور ہوٹل کو بھی نقصان پہنچایا جس کے سبب ہوٹل انتظامیہ نے اس پر 10 ہزار 890 درہم جرمانہ عائد کیا۔
مزید پڑھیں: موبائل کارڈ مانگنے پر شوہر نے بیوی کو قتل کردیا
اماراتی شخص کی 23 سالہ اہلیہ کے مطابق 23 اگست 2018 کو میں اپنے شوہر اور 2 بچوں کے ہمراہ دبئی کے ہوٹل روم میں موجود تھی کہ شوہر اچانک ہی مشتعل ہوگیا اور وہ سمجھنے لگا کہ میں اس کی جاسوسی کررہی ہوں۔
شوہر کی جانب سے بہیمانہ تشدد کا نشانہ بنایا گیا تو میں دروازے سے ٹکرا کر نیچے گری اس کے بعد اس نے میرے منہ پر مکا مارا جس کے نتیجے میں میری ناک ٹوٹ گئی۔
خاتون کے مطابق کچھ مہمان اور سیکیورٹی گارڈ نے واقعے کی اطلاع پولیس کو دی جس کے بعد مجھے طبی امداد کے لیے اسپتال منتقل کیا گیا۔
دوران تفتیش ملزم نے اہلیہ پر تشدد کرنے کا اعتراف کرلیا، عدالت نے مقدمے کی سماعت ملتوی کردی، ملزم پر20 فروری کو فرد جرم عائد کی جائے گی۔
