The news is by your side.

لیڈی گاگا کے ملازم پر گولی چلانے والے شخص کو 21 سال قید کی سزا

امریکی گلوکارہ لیڈی گاگا کے ملازم کو گولی مارنے والے شخص کو 21 برس قید کی سزا سنا دی گئی، ملزم نے کتوں کی رکھوالی کرنے والے ملازم پر فائرنگ کر کے قیمتی نسل کے کتے چرانے کی کوشش کی۔

امریکی میڈیا رپورٹ کے مطابق معروف امریکی گلوکارہ لیڈی گاگا کے کتوں کی رکھوالی پر معمور ملازم کو گولی مارنے والے شخص کو 21 برس قید کی سزا سنا دی گئی۔

اس شخص نے گزشتہ برس فروری میں اپنے 2 ساتھیوں کے ساتھ مل کر ہالی وڈ کی ایک سڑک پر لیڈی گاگا کے فرانسیسی بل ڈاگ نسل کے کتے چھیننے کے دوران ان کی دیکھ بھال کرنے والے ریان فشر کو گولی کا نشانہ بنایا تھا۔

واقعے کے مرکزی ملزم 20 سالہ جیمز ہووارڈ جیکسن کو پیر کو سزا سنائی گئی ہے، حملے میں ریان فشر کو سینے میں چوٹیں آئی تھیں اور ایک ماہ بعد انسٹاگرام پر انہوں نے بتایا کہ ان کا پھیپھڑا متاثر ہوا تھا۔

ڈسٹرکٹ اٹارنی کے دفتر سے ایک بیان میں کہا گیا ہے کہ درخواست کے معاہدے میں مسٹر جمیز ہووارڈ جیکسن کو پرتشدد فعل کے ارتکاب کا ذمہ دار ٹھہرایا گیا ہے اور متاثر ہونے والے فریق کو انصاف فراہم کیا گیا ہے۔

واقعے میں ملوث دو دیگر حملہ آوروں کو پہلے ہی اس جرم میں جیل بھیج دیا گیا ہے۔

خیال رہے کہ اس واقعے کے بعد لیڈی گاگا نے اپنے 2 کتوں کی واپسی کے لیے لگ بھگ 8 کروڑ روپے انعام کی پیشکش کی تھی، انعام کے اس اعلان کے بعد کتے واپس کرنے والی خاتون پر چوری شدہ سامان وصول کرنے کا الزام عائد کیا گیا تھا۔

اس واقعے میں گلوکارہ کی دوسری بل ڈاگ مس ایشیا اغوا ہونے سے بچنے میں کامیاب رہی اور وہ ڈاکوؤں کے جانے کے بعد زخمی ریان فشر کی طرف واپس بھاگ گئی تھی۔

رواں برس کے اوائل میں جیمز ہووارڈ جیکسن کو غلطی سے حراست سے رہا ہو جانے کے بعد دوبارہ پکڑ لیا گیا تھا۔

لاس اینجلس پولیس کا کہنا ہے کہ وہ نہیں سمجھتے کہ کتوں کو ان کی مالکہ کی وجہ سے نشانہ بنایا گیا ہے بلکہ بلیک مارکیٹ میں اس نسل کے کتوں کی مانگ کی وجہ سے ایسا کیا گیا ہے۔

Comments

یہ بھی پڑھیں