نئی دہلی: بھارتی ریاست مہاراشٹرا میں چور 30 ہزار مالیت کے دھکن چرا کر فرار ہوگیا۔
غیرملکی خبررساں ادارے کی رپورٹ کے مطابق ممبئی کی مالابار ہل پولیس نے 30 ہزار مالیت کے دھکن چرا کرفرار ہونے والے شخص کو گرفتار کرلیا۔
پولیس کا کہنا ہے کہ 32 سالہ ملزم روی کمار ٹھاکر نے وکیشور کے علاقے سے آئرن سے بنے گٹر کے دھکن چرائے تھے جن کی تعداد 10 کے قریب تھی۔
مالابار کے متعدد افراد نے گٹر کے دھکن چوری ہونے کی متعدد بار شکایت درج کرائی تھی اور جب پولیس نے بی ایم سی سے جانچ پڑتال کی تو انہیں بتایا گیا کہ مین ہول باقاعدگی سے چوری ہورہے ہیں۔
پولیس کے مطابق ملزم کو ابتدائی طور پر ایک مقامی شہری للت پٹیل نے 10 جنوری کو ایک سی سی ٹی وی فوٹیج میں مجرمانہ سرگرمی کرتے دیکھا تھا۔
رپورٹ کے مطابق جب ٹھاکر والکیشور روڈ پر داسکوٹ بنگلے کے باہر سے ایک گٹر کا دھکن چوری کرنے کی کوشش کررہا تھا تو بنگلے میں موجود سی سی ٹی وی آپریٹر نے پولیس کو کال کی اور اسے گرفتار کرایا۔
پولیس کا کہنا ہے کہ ٹھاکر گٹر کے دھکن کو کباڑئیے کو فروخت کرتا تھا، اس کیس میں مزید دو افراد مطلوب ہیں، یہ تین افراد کا گروہ ہے جو رات کے وقت گٹر کے دھکن غائب کردیتا ہے۔