نئی دہلی: بھارت کے دارالخلافہ دہلی میں امریکی صدر کی آمد کے موقع پر ہونے والے خوف ناک فسادات نے مسلمانوں کے خلاف نئی دل دہلا دینے والی کہانیوں کو جنم دیا ہے۔
تفصیلات کے مطابق دہلی میں ہونے والے فسادات کی دردناک کہانیاں سامنے آنے لگی ہیں، معلوم ہوا ہے کہ ان فسادات میں متعدد مسلمان نوجوان غائب ہو گئے ہیں اور ان کے اہل خانہ کی فریاد کہیں بھی نہیں سنی جا رہی۔
بھارتی ویب سائٹ دی وائرپر شایع ہونے والی ایک رپورٹ میں انکشاف کیا گیا ہے کہ 25 اور 26 فروری کو دو مسلم نوجوان دہلی میں غائب ہوئے، اور تب سے اب تک ان کا کوئی اتا پتا نہیں چلا۔ اہل خانہ نے مقامی پولیس تھانوں کے بھی بے شمار چکر لگائے تاہم انھیں صرف پولیس کے متعصبانہ اور فرقہ ورانہ جملے ہی سننے کو ملے۔
رپورٹ میں کہا گیا ہے کہ اترپردیش کے شہر میرٹھ سے حمزہ نامی نوجوان چند ماہ قبل کاروبار کے سلسلے میں دہلی آیا تھا اور اس نے اپنے بہنوئی کے ساتھ برگر کی ایک چھوٹی سی دکان کھول لی تھی، 26 فروری کو وہ اچانک غائب ہو گیا، رابطہ کرنے پر موبائل بھی بند آ رہا تھا، حمزہ کے بہنوئی عارف نے میڈیا کو بتایا کہ جب وہ گم شدگی کی رپورٹ درج کرانے تھانے گیا تو پولیس نے رپورٹ لکھنے سے انکار کر دیا اور اہل کار نے کہا کہ تم اللہ کو مانتے ہو اور روزہ نماز کے پابند ہو اور سب سے زیادہ فساد بھی تم ہی کرتے ہو۔
دہلی واقعات پر اپوزیشن کا احتجاج، وزیرداخلہ کے استعفیٰ کا مطالبہ
عارف کا کہنا تھا کہ انھوں نے تمام اسپتالوں میں بھی حمزہ کو تلاش کیا لیکن کوئی سراغ نہیں ملا۔ پولیس کسی بھی طور تعاون کے لیے تیار نہیں، پولیس کی جانب سے طنز بھی کیا گیا کہ تمھیں تو آزادی چاہیے تھی، اب لو آزادی۔
رپورٹ میں کہا گیا ہے کہ اترپردیش سے دہلی آیا ہوا ایک اور مسلم نوجوان جمیل بھی 25 فروری سے غائب ہے، اسے دہلی آئے ہوئے ڈیڑھ ماہ ہی ہوا تھا کہ اس کے ساتھ یہ حادثہ پیش آ گیا ہے۔ جمیل ایک بیٹی کا باپ ہے اور اس کی بیوی گاؤں میں رہتی ہے۔ جب سے بیٹا گم ہوا، ماں نور جہاں نے کھانا بھی نہیں کھایا۔ جمیل کے بھائی سلیم نے بتایا کہ وہ نماز کے لیے قریبی مسجد گیا اور پھر واپس نہیں آیا۔
جمیل کی ماں نے روتے ہوئے بتایا کہ ایک بار گر کر اس کا پیر ٹوٹ گیا تھا، جس کے لیے اس میں راڈ ڈالی گئی، اس کا پیر درد بھی کرتا تھا، پتا نہیں اب وہ کیسے ہوگا اور کہاں ہوگا؟ جمیل کے بھائی کا کہنا تھا کہ بہت تلاش کیا لیکن بھائی نہیں ملا، پولیس بھی تعاون نہیں کر رہی ہے۔
