کراچی : پیپلزپارٹی کے رہنما منظور وسان نے بڑی پیشگوئیاں کرتے ہوئے کہا ہے کہ نوازشریف سال2022 تک واپس نہیں آئیں گے اور عمران خان جس تیزی سے آئے ، اسی تیزی سے واپس چلے جائیں گے۔
سیاسی پیشگوئیوں کے حوالے سے شہرت رکھنے والے پاکستان پیپلز پارٹی کے رہنما منظور وسان نے میڈیا سے گفتگو کرتے ہوئے کہا ہے کہ سال2022 تک نواز شریف وطن واپس نہیں آئیں گے اور عمران خان جس تیزی سےحکومت میں آیا تھا اسی تیزی سےواپس جائےگا۔
الیکشن کے حوالے سے منظور وسان کا کہنا تھا کہ سال2022کےآخرمیں ملک میں عام انتخابات ہوتےدیکھ رہاہوں، الیکشن سال 2022کےاگست،ستمبر یا اکتوبرمیں ہوسکتےہیں۔
آئندہ انتخابات میں جیت سے متعلق پی پی رہنما نے کہا کہ بلاول بھٹوکی قیادت میں پیپلزپارٹی آگےآئےگی اور ملک میں صاف شفاف انتخابات ہوئے تو پیپلز پارٹی جیتےگی، آئندہ انتخابات میں مقابلہ ن لیگ اورپیپلزپارٹی میں ہوگا جبکہ ایم کیو ایم اورجماعت اسلامی تقسیم ہوجائیں گی۔
ان کا مزید کہنا تھا کہ پی پی پی کراچی میں بھی جیتے گی، پہلے سے زیادہ سیٹیں لےگی تاہم آئندہ انتخابات میں پی ٹی آئی کراچی سےایک سیٹ بھی مشکل سے جیتے گی۔
مشیر زراعت نے کہا کہ یہ سیاست ہےہی بچوں کاکھیل، اب بوڑھوں کانہیں ہے، مولانا صاحب اورہم اب آرام کریں گے،بچےآگےآئیں گے۔