کراچی: پیپلزپارٹی کے رہنما اور اپنے خوابوں سے مشہور صوبائی وزیر سندھ منظور وسان نے کہا ہے کہ اپریل شہادتوں کا مہینہ رہا ہے اسی ماہ سیاست کروٹ بدلے گی، متحدہ لندن، پاکستان اور مصطفیٰ کمال الیکشن سے پہلے ایک ہوجائیں گے۔
کراچی میں میڈیا سے گفتگو کرتے ہوئے منظور وسان نے کہا کہ متحدہ پاکستان ہو یا لندن اُن کے پاس رونے کے سوا کچھ نہیں بچا، جیل والوں نے میئر کراچی کو اچھی دال روٹی نہیں کھلائی اس لیے وہ رہائی کے بعد اچھل کود کررہے ہیں۔
انہوں نے کہا کہ پاکستان کی تاریخ میں اپریل شہادتوں کا مہینہ رہا ہے، اسی ماہ سیاست کا کروٹ بدلے گا اور اپریل کے بعد پی پی اور ن لیگ کا اصل سیاسی میچ شروع ہوگا، بھٹو کا تیر چلے گا تو شیر اور پتنگ کہیں نظر نہیں آئیں گے۔
منظور وسان نے دعویٰ کیا کہ متحدہ پاکستان، لندن اور مصطفیٰ کمال انتخابات سے قبل ایک ہوجائیں گے مگر کچھ بھی ہوجائے آئندہ انتخابات میں پیپلزپارٹی واضح برتری حاصل کرکے حکومت بنائے گی۔
صوبائی وزیر نے کہا کہ پیپلزپارٹی رہنماؤں کے نام ای سی ایل میں ڈالنے سے کوئی فائدہ نہیں ہوگا، پی پی نے سیاسی جدوجہد کا آغاز کردیا جس کے بعد میاں صاحب کو رائیونڈ سمیت ملک میں کہیں بھی چھپنے کی جگہ نہیں ملے گی۔
