کراچی: پاکستانی ڈرامہ انڈسٹری کی معروف اداکارہ مریم انصاری سابق قومی کرکٹر معین خان کے بیٹے اویس خان کے ساتھ رشتہ ازدواج میں منسلک ہوگئیں۔
قومی کرکٹ ٹیم کے سابق کپتان و وکٹ کیپر معین خان کے بیٹے اویس خان نے اپنی انسٹاگرام اسٹوریز میں اداکارہ مریم انصاری سے نکاح اور شادی کی دیگر تقریبات کی ویڈیوز اور تصاویر شیئر کیں۔
سوشل میڈیا پر اداکارہ مریم انصاری کی شادی کی تصاویر وائرل ہو رہی ہیں جنہیں ٹی پنک رنگ کے خوبصورت عروسی لباس میں دیکھا جا سکتا ہے۔
دوسری جانب سابق کپتان معین خان کے بیٹے اویس خان نے کریم رنگ کا کرتا پاجامہ اور اسی رنگ کا ہی ویسٹ کوٹ پہنا ہوا ہے۔
سوشل میڈیا پر وائرل ہونے والی تصاویر میں دیکھا جا سکتا ہے کہ مریم انصاری کی شادی میں پاکستان شوبز انڈسٹری سے تعلق رکھنے والی متعدد شخصیات نے بھی شرکت کی۔
اویس خان اور مریم انصاری کی شادی کی تقریب میں اداکار فیصل قریشی نے بھی اپنی فیملی کے ساتھ شرکت کی۔
مداح مریم انصاری اور اویس خان کی جوڑی کو بہت پسند کر رہے ہیں اور ان کی آئندہ زندگی کے لیے نیک خواہشات کا اظہار بھی کر رہے ہیں۔
واضح رہے کہ مریم انصاری اداکار علی انصاری کی بہن ہیں، اے آر وائی ڈیجیٹل پر مریم انصاری کا ڈرامہ ’فریاد‘ انہی دنوں نشر کیا جارہا ہے۔
خیال رہے کہ اداکارہ مریم انصاری نے ابھی تک اپنے سوشل میڈیا اکاؤنٹس پر شادی کی تصاویر شیئر نہیں کی ہیں۔
View this post on Instagram
