کراچی: دنیا کے نمبر ون بلے باز مارنوس لبوشین کو کراچی کی دال روٹی پسند آگئی جس کی تصویر انہوں نے سوشل میڈیا پر شیئر کردی۔
تفصیلات کے مطابق آسٹریلوی کرکٹر مارنوس لبوشین نے سماجی رابطے کی ویب سائٹ ٹویٹر پر دال روٹی کی تصویر شیئر کرتے ہوئے لکھا کہ وہ دن کے کھانے میں بھی دال اور روٹی ہی کھائیں گے کیونکہ یہ ڈش انہیں بہت مزیدار لگی ہے۔
مارنوس لبوشین کی اس ٹویٹ کو ہزاروں صارفین دیکھ چکے ہیں اور انہیں کراچی کے دیگر کھانے کھانے کا بھی مشورہ دے رہے ہیں۔
Daal and roti for lunch too. Delicious pic.twitter.com/w5KgimFo1N
— Marnus Labuschagne (@marnus3cricket) March 11, 2022
واضح رہے کہ اس سے قبل پنڈی کرکٹ اسٹیڈیم میں راولپنڈی ٹیسٹ کے دوران شائقین کرکٹ کی طرف سے مارنوس لبوشین کو سب سے زیادہ پیار اور احترام ملا۔
مزید پڑھیں: مارنوس لبوشین نے اپنے نام کا ’تلفظ‘ بتادیا
مارنوس لبوشین سے منسلک پوسٹرز پر ان کے مشکل نام یاد کرنے کے حوالے سے لکھا گیا تھا تو کسی پر نام کا تلفظ لکھا گیا تھا۔
پنڈی اسٹیڈیم میں ہر جانب اپنے پوسٹرز دیکھ کر مارنوس بھی ردعمل دینے سے خود کو روک نہ سکے تھے۔
پہلے ٹیسٹ کے آخری روز میچ کے آغاز سے قبل مارنوس لبوشین نے ٹوئٹر پر جاری بیان میں کہا تھا کہ مجھے راولپنڈی میں شائقین کے تمام تر پوسٹرز بہت پسند آئے ہیں، پاکستان میں خوش آمدید کہنے والوں کا شکرگزار ہوں۔
پاکستان اور آسٹریلیا کے درمیان دوسرا ٹیسٹ میچ 12 مارچ سے کراچی کے نیشنل اسٹیڈیم میں کھیلا جائے گا۔
