پنجاب کی سینئر صوبائی وزیر مریم اورنگزیب کے بیٹے اورنگزیب احمد نے پاکستان ایم ایم اے کنٹینڈر سیریز میں کامیابی حاصل کرلی۔
پنجاب کی سینئر وزیر مریم اورنگزیب کے بیٹے اورنگزیب احمد نے پاکستان ایم ایم اے کنٹینڈر سیریز کے 52 کلو گرام کیٹیگری کے مقابلے میں حریف فیضان کو ناک آؤٹ شکست دے کر رنگ میں اپنی دھاک بٹھا دی۔
نوجوان فائٹر نے یہ شاندار فتح حاصل کرنے کے لیے عمدہ کارکردگی کا مظاہرہ کیا جو مکسڈ مارشل آرٹس میں ان کے پیشہ ورانہ کیریئر کی جانب ایک اور اہم قدم ہے۔
مقابلے کے بعد گفتگو کرتے ہوئے اورنگزیب نے کہا کہ یہ فائٹ ان کی مہارت کو مزید نکھارنے اور اعتماد بڑھانے کا ایک بہترین موقع تھی کیونکہ وہ بین الاقوامی سطح پر پاکستان کی نمائندگی کرنے کے اپنے طویل مدتی ہدف پر کام کر رہے ہیں۔
اورنگزیب نے والدہ مریم اورنگزیب کی غیر متزلزل حمایت کا بھی تہہ دل سے اعتراف کیا اور کہا کہ والدہ نے ان کی حوصلہ افزائی کی ہے۔
انہوں نے بتایا کہ وہ اپنی تکنیک، فٹنس اور مجموعی کارکردگی کو بہتر بنانے کے لیے روزانہ چار سے پانچ گھنٹے سخت ٹریننگ کرتے ہیں۔
اورنگزیب نے کہا کہ وہ یو ایف سی کے سابق لائٹ ویٹ چیمپئن حبیب نورماگومیدوف کے نقشِ قدم پر چلنے کے خواہشمند ہیں، جو اس کھیل کی تاریخ کی کامیاب ترین شخصیات میں سے ایک ہیں۔
‘پاکستان ایم ایم اے ایف کنٹینڈر سیریز’ ایک روزہ ایونٹ ہے جس میں 12 مقابلے (فائٹس) شامل ہیں۔ اس کا مقصد پاکستان میں ایتھلیٹس کی ترقی کے نظام کو مضبوط بنانا اور ملک کے بہترین مکسڈ مارشل آرٹسٹس کو بین الاقوامی مقابلوں کے لیے تیار کرنا ہے۔
واضح رہے کہ اورنگزیب احمد اب ابوظہبی میں ہونے والی ‘آئی ایم ایم اے ایف یوتھ ورلڈ چیمپئن شپ’ میں پاکستان کی نمائندگی کریں گے۔
