پاکستانی کھانے کھا کھا کر جرمن سفیر کا وزن بڑھ گیا، نئے کپڑے بنانے پڑ گئے -
The news is by your side.

Advertisement

پاکستانی کھانے کھا کھا کر جرمن سفیر کا وزن بڑھ گیا، نئے کپڑے بنانے پڑ گئے

اسلام آباد: پاکستان میں تعینات جرمن سفیر مارٹن کوبلر نے مقامی کھانے کھا کھا کر وزن میں اضافہ کر لیا، جس کے باعث وہ پریشان ہو گئے ہیں۔

تفصیلات کے مطابق جرمن سفیر مارٹن کوبلر ان دنوں پاکستان کے سیاحتی مقامات کی سیر کے ساتھ ساتھ مقامی ڈشز کھانے کے بھی شوقین نکلے ہیں۔

پاکستانی کھانوں کے آگے بے بس ہو جاتا ہوں۔

مارٹن کوبلر جرمن سفیر

مارٹن کوبلر کبھی بریانی کھاتے دکھائی دیتے ہیں تو کبھی نان مٹن نوش کرتے نظر آتے ہیں۔

جرمن سفیر کو پاکستانی کھانوں کا شوق اس طرح چرایا ہے کہ ان کے وزن میں اضافہ ہو گیا، اور انھیں اب نئے کپڑے سلوانے پڑ گئے ہیں۔

سماجی رابطوں کی ویب سائٹ ٹویٹر پر انھوں نے تصویر شیئر کی ہے جس میں وہ کپڑوں کی ایک دکان میں کھڑے ہیں اور نئے کپڑے سلوانے کے لیے ناپ دے رہے ہیں۔

تاہم، جرمن سفیر کو وزن بڑھنے پر پریشانی کے با وجود پاکستانی کھانے کھانے کے شوق پر کوئی پشیمانی نہیں، اس لیے انھوں نے وزن کم کرنے کی بہ جائے نئے کپڑے سلوانے کو ترجیح دی۔

مارٹن کوبلر نے ٹویٹ کرتے ہوئے دل چسپ انداز میں لکھا کہ بوجھیں کہ مجھے نئے کپڑوں کی ضرورت کیوں پڑ گئی؟

یہ بھی پڑھیں:  جرمن سفیر نے اپنی سائیکل پاکستانی ٹرک آرٹ سے سجا دی

جرمن سفیر پاکستانی کھانوں کے علاوہ میٹھے میں جلیبی بھی شوق سے کھاتے ہیں، وہ مختلف تقریبات میں اکثر شوق سے مقامی ڈشز کھاتے ہوئے دیکھے جاتے ہیں۔

یہ بھی پڑھیں:  جرمن سفیر اسلام آباد کی پناہ گاہ پہنچ گئے، بے گھر افراد کے ساتھ کھانا بھی کھایا

انھوں نے ٹویٹ میں کھانوں کا ذکر کرنے کے بعد اپنے پاکستانی میزبانوں کو مخاطب کرتے ہوئے یہ بھی لکھا کہ ’اس کے ذمے دار آپ لوگ ہیں۔‘

جرمن سفیر مارٹن کوبلر نے پاکستانی مہمان نوازی کو نہایت قابل ذکر قرار دیا، ان کا کہنا تھا کہ وہ پاکستانی کھانوں کے آگے بے بس ہو جاتے ہیں۔

Comments

comments

یہ بھی پڑھیں