The news is by your side.

Advertisement

بھارتی فوج کی فائرنگ سے شہید لانس نائیک تیمور اسلم فوجی اعزاز کے ساتھ سپرد خاک

لاہور: مظفرآباد میں لائن آف کنٹرول پر دشمن کی بزدلانہ کارروائی کا مقابلہ کرتے ہوئے جام شہادت نوش کرنے والے لانس نائیک تیمور اسلم کو فوجی اعزاز کے ساتھ سپرد خاک کردیا گیا۔

تفصیلات کے مطابق مظفر آباد میں لائن آف کنٹرول پر بھارتی فوج کی بزدلانہ کارروائی کا مقابلہ کرتے ہوئے جام شہادت نوش کرنے والے لاہور کے لانس نائیک تیمور اسلم کو فوجی اعزاز کے ساتھ والٹن روڈ باب پاکستان قبرستان میں سپرد خاک کردیا گیا۔

والٹن روڈ پیرکالونی کے رہائشی لانس نائیک تیمور اسلم مظفرآباد میں بھارتی فورسز سے جھڑپ کے دوران شہید ہوگئے تھے، شہید کا جسد خاکی جمعہ کی شب رہائش گاہ پیر کالونی پہنچایا گیا تو شہریوں کی بڑی تعداد موجود تھی۔

شہید تیمور اسلم کے جسد خاکی کو کچھ دیر رہائشگاہ رکھنے کے بعد ایمبولینس کے ذریعے باب پاکستان قبرستان روانہ کیا گیا، پاک فوج کے افسران بھی جسد خاکی کے ہمراہ موجود تھے۔

مزید پڑھیں: بھارتی فوج کی بلا اشتعال فائرنگ سے پاک فوج کے 3 جوان شہید

نماز جنازہ میں وزیر اوقاف پنجاب پیر سعید الحسن شاہ، اہل علاقہ کی بڑی تعداد اور پاک فوج کے جوانوں نے بھی شرکت کی۔

شہید تیمور اسلم نے آٹھ سال قبل پاک فوج میں شمولیت اختیار کی تھی، تیمور کی ڈیڑھ سال قبل شادی ہوئی تھی، شہید نے پسماندگان میں اہلیہ اور چار ماہ کی بیٹی کو چھوڑا ہے۔

واضح رہے کہ گزشتہ روز بھارتی فوج کی بلااشتعال فائرنگ سے پاک فوج کے تین جوان شہید ہوگئے تھے، جوابی کارروائی میں 5 بھارتی فوجی مارے گئے تھے۔

Comments

comments

یہ بھی پڑھیں