The news is by your side.

Advertisement

دو بار پہلے جیل کاٹی، تیسری بار بھی کاٹ لوں گی، دل میں کوئی خوف نہیں، مریم نواز

لاہور: مسلم لیگ ن کی نائب صدر مریم  نواز نے نیب کی درخواست کو مضحکہ خیز قرار دیتے ہوئے عدلیہ سے درخواست کی کہ نیب درخواست کا نوٹس لے ، دوبارپہلےجیل کاٹی تیسری بار بھی کاٹ لوں گی،دل میں کوئی خوف نہیں۔

تفصیلات کے مطابق مسلم لیگ ن کی نائب صدر مریم نواز نے اسلام آباد روانگی سے قبل جاتی امرا میں میڈیا سے گفتگو کرتے ہوئے کہا کہ ہائیکورٹ میں نیب نے مضحکہ خیز درخواست دی ہے، نیب کا کام ہے کرپشن کو پکڑے ، جس میں بری طرح ناکام ہوا، اب کہہ رہے ہیں کہ مریم سیاسی بیانات دے رہی ہیں ، میرانہیں خیال اس سےزیادہ مضحکہ خیز درخواست کوئی ہوسکتی تھی۔

مریم نواز کا کہنا تھا کہ تیسری بار گرفتاری کے لئے تیارہوں، گرفتاری کی صورت میں نواز شریف ہی لانگ مارچ کی قیادت کریں گے۔

ن لیگی رہنما نیب پر تنقید کرتے ہوئے کہا کہ نیب کا کام کرپشن پکڑنا ہے کسی ادارے کی ترجمانی نہیں، جس کیس میں نیب لاہور ہائی کورٹ گیا اس میں کچھ بھی نہیں، نیب پر ان کے خلاف جو پٹیشن دائر ہوئی اس پر نیب کے خلاف ہی مقدمہ درج ہونا چاہئیے۔

ان کا کہنا تھا کہ قوم گواہ ہے نیب نے جب بلایا میں گئی ،مجھ پر قاتلانہ حملہ ،پتھراؤ کیاگیا، پتھر اورگولیاں کھانے کے بعد بھی نیب کے گیٹ کے باہرایک گھنٹہ کھڑی رہی۔

مریم نواز نے مزید کہا کہ جس کیس میں گرفتار کیا گیا اس پر آج تک ریفرنس نہیں ہوسکا، اتنا بڑا جھوٹ لاہور ہائی کورٹ میں بولاکہ مریم تعاون نہیں کر رہیں، انھوں نے سوچا لانگ مارچ ہورہا ہے تو مریم کو گرفتار کرلو۔

مسلم لیگ ن کی نائب صدر کا کہنا تھا کہ پاکستانی شہری ہوں آئین اور قانون مجھے سیاست کا حق دیتاہے ، مریم نواز دوبار بے گناہ جیل کاٹ آئی تیسری بار بھی کاٹ لےگی، میرے دل میں کوئی خوف نہیں۔

انھوں نے عدلیہ سے درخواست کی نیب کی ایپلی کیشن کا نوٹس اور ایکشن لے، سیاستدان سیاست نہیں کرے گا تو اور کیا کرے گا، آپ سمجھتے ہیں مریم کو جیل ، ضمانت منسوخی کی دھمکیوں سے ڈرا لیں گے تو یہ نہیں ہوگا۔

چیئرمین سینیٹ کے انتخاب کے حوالے سے مریم نواز نے کہا یوسف رضاگیلانی کے نام پر مہریں لگی تھیں ، امیدوار کے خانے میں نام پر مہر لگتی ہے تووہ امیدوار پر ہی ہے نا، معاملہ عدالت لے جائیں گے انشااللہ یوسف گیلانی جیت جائیں گے۔

اپوزیشن کے لائحہ عمل سے متعلق ن لیگی رہنما کا کہنا تھا کہ لانگ مارچ اوراستعفےدونوں آپشن موجود ہیں ، آج ہماری اپنی میٹنگ ہےپی ڈی ایم کاکل اجلاس ہے، انشااللہ یہ حکومت نہیں چل سکتی اسےگھرجاناپڑےگا، آپ کا مریم نوازکوباہر بھیجنے کا خواب پورا نہیں ہوگا، ٹرے میں رکھ کربھی پاسپورٹ لائیں،ٹکٹ دیں توکہوں گی اٹھاؤ اور چلتے بنو۔

انھوں نے مزید کہ میں سمجھتی ہوں کوئی ایسانہیں جس نےیوسف گیلانی کوووٹ نہیں دیا، یوسف رضاگیلانی جیت جاتے تو غفور حیدری صاحب بھی جیت جاتے۔

Comments

یہ بھی پڑھیں