وزیراعظم کو نہیں نظام عدل بدلنے کی ضرورت ہے، مریم نواز -
The news is by your side.

Advertisement

وزیراعظم کو نہیں نظام عدل بدلنے کی ضرورت ہے، مریم نواز

لاہور : سابق اورنااہل وزیر اعظم کی صاحبزادی مریم نواز نے کہا ہے کہ دو مرتبہ آئین توڑنے والے پرویز مشرف کو سزا دینے کی کسی میں ہمت نہیں، پاکستان میں وزیراعظم نہیں بلکہ نظام عدل کو بدلنے کی ضرورت ہے، نوازشریف کی مخالفت میں پاکستان کوسزا نہ دی جائے۔

ان خیالات کا اظہار انہوں نے لاہور میں سینٹ انتھونی چرچ میں اپنی والدہ بیگم کلثوم نواز کیلئے دعائیہ تقریب سے خطاب کرتے ہوئے کیا۔

مریم نواز نے کہا کہ آپ کیلئے نوازشریف اور کلثوم نواز کا سلام لے کر آئی ہوں، آپ کی دعاؤں سے میری والدہ کلثوم نواز صحت یاب ہورہی ہیں، ہم سب پاکستانی ہیں، ہمارےدکھ درد سانجھے ہیں، نواز شریف اپنی نہیں ملکی ترقی اور ووٹ کے تقدس کی جنگ لڑ رہا ہے۔

عوام نے نواز شریف کی نااہلی کا فیصلہ قبول نہیں کیا

انہوں نے کہا کہ اسلام آباد سے لاہور تک نواز شریف کے استقبال نے ثابت کردیا کہ عوام کو نااہلی کا فیصلہ قبول نہیں، ہم جمہوریت پر حملہ، سازشیں کرنے اور پہاڑوں پر چھپ کر بیٹھنے والے نہیں، پوری قوم نواز شریف کے پیچھے کھڑی ہے۔

مریم نواز نے کہا کہ خیبر پختونخواہ میں ڈینگی آیا تو عوام نے عمران خان کو نہیں، شہباز شریف کو بلایا،17ستمبر کو قوم ووٹ کا تقدس بحال کرنے کیلئے باہر نکلے۔

نواز شریف کو نااہل کرکے ملکی ترقی کو روکا گیا

انہوں نے کہا کہ میں آج آپ کی عدالت میں نوازشریف کا مقدمہ لے کرآئی ہوں، جب نواز لیگ کو حکومت ملی تو مساجد اور عبادت گاہوں پر دہشت گردی کے حملے کئے جارہے تھے، نوازشریف کو ہمیشہ تباہ حال پاکستان ملا لیکن اب ملک ترقی کےمنازل طے کررہاتھا، ملک میں سی پیک اور بجلی کے کارخانے لگ رہے تھے۔

نواز شریف ہمیشہ ترقی کرتا پاکستان لوٹا کرجاتے ہیں، مریم نواز نے مزید کہا کہ نوازشریف کو نااہل کرکے ملک کی ترقی کوکیوں روکاگیا؟ ملک میں عدم استحکام کیوں لایاگیا؟ کون ہے جس کے جذبے سےملک سے دہشت گردی کا خاتمہ ہوا؟

ملک کے منتخب وزیر اعظم کو محض بیٹےسے تنخواہ نہ لینے پرہٹادیا گیا، ملک میں وزیراعظم کو نہیں بلکہ نظام عدل کو بدلنے کی ضرورت ہے۔

اس موقع پر وفاقی وزیر کامران مائیکل کا کہنا تھا کہ نواز شریف کو نااہل کیا جا سکتا ہے لیکن عوام کے دلوں سے نہیں نکالا جا سکتا۔

صوبائی وزیر خلیل طاہر سندھو نے کہا کہ نواز شریف پاکستان میں ترقی کی ضمانت ہے۔ تقریب میں آرچ بشپ نے کلثوم نواز کی صحت یابی کیلئے خصوصی دعا بھی کرائی۔


اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی وال پر شیئر کریں۔

Comments

comments

یہ بھی پڑھیں