The news is by your side.

Advertisement

میں ایک نہیں دو بچوں کی نانی ہوں، مریم نواز

کراچی: پاکستان مسلم لیگ ن کی نائب صدر مریم نواز شریف نے کراچی جلسے خطاب کرتے ہوئے کہا کہ وہ ایک نہیں بلکہ دو بچوں کی نانی ہیں۔

کراچی میں پی ڈی ایم کے جلسہ عام سے خطاب کرتے ہوئے مریم نواز نے ایک بار پھر حکومت اور وزیراعظم عمران خان کو شدید تنقید کا نشانہ بنایا اور اپنے دور حکومت کو شاندار قرار دیا۔

اُن کا کہنا تھا کہ ’میں ایک نہیں بلکہ دو بچوں کی نانی ہوں، ایک نواسی کی عمر تین سال جبکہ دوسرے نواسے کی عمر ڈھائی ماہ ہے، میں اپنی بیٹی سے نواسے اور نواسی کو اپنے پاس بلوا لیتی ہوں، مجھے نواسے نواسیوں کے ساتھ بہت خوشی ہوتی ہے‘۔

مریم نواز کا کہنا تھا کہ ’نانی ماں کی بھی ماں ہوتی ہے، یعنی ماں کی جنت اُس کے قدموں کے نیچے ہوتی ہے، آپ نےمیری  نہیں بلکہ نانی جیسےمقدس رشتےکی تضحیک کی، یہ رشتے نصیب والوں کو ملتے ہیں‘۔

مزید پڑھیں: جلسے سے جانے والوں‌ کو کیوں‌ دکھایا؟ صحافی پر جیالوں‌ کا تشدد

مسلم لیگ ن کی نائب صدر کا کہنا تھا کہ ’یہ رشتے نعمت اور خدا کی دین ہیں، خدا ان لوگوں یہ رشتے دیتا ہے جو نبھانا جانتے ہیں، جو خاندان کی اقدار کو جانتے ہیں اور جو رشتے نبھانا جانتے ہیں، انہیں نانی اور دادی جیسے رشتے نصیب ہوتے ہیں‘۔

مریم نواز کا کہنا تھا کہ ’ہم آج متحد ہیں مگر کل جب انتخابات ہوں گے تو ایک دوسرے کے حریف بن کر میدان میں آئیں گے مگر کسی کی تضحیک نہیں کریں گے، ایک دوسرے کے مخالف ہوں گے مگر دشمنی نہیں کریں گے‘۔

انہوں نے بتایا کہ مولانا فضل الرحمان میرے سر پر بیٹیوں کی طرح ہاتھ رکھتے ہیں، زرداری صاحب بیٹی کہہ کر مخاطب کرتے ہیں، اور بلاول بڑی بہن مانتا ہے۔ اس موقع پر مریم نواز نے بلاول بھٹو کو مخاطب کر کے کہا کہ ’بلاول آؤ، مل کر آج یہ وعدہ کریں کہ ہم مخالفت میں اتنی آگے نہیں جائیں گے، ہم انتخابی میدان میں سیاسی حریف ہوں گے مگر دشمن نہیں ہوں گے‘۔

مریم کا کہنا تھا کہ بلاول کی والدہ اور میرے والد کا سیاسی مخالفت کے باوجود ایک دوسرے کے لیے احترام کا رشتہ ہے، آج ہم دونوں مل کر اس سلسلے کو آگے بڑھا رہے ہیں، بے نظیر نے بلاول کو اور مجھے نوازشریف نے یہی سکھایا ہے۔

یہ بھی پڑھیں: کراچی، پی ڈی ایم کے جلسے میں بدنظمی، کارکنان آپے سے باہر

اپنے خطاب میں مریم نواز نے کراچی کے شہریوں کو مبارک باد پیش کی جبکہ جلسے کے انتظامات پر پیپلزپارٹی کی قیادت کو بھی خراج تحسین پیش کیا، ساتھ ہی مسلم لیگ ن کی نائب صدر نے کرونا کے خلاف اقدامات کرنے پر سندھ حکومت کی کارکردگی کو بھی خراج تحسین پیش کیا۔

Comments

یہ بھی پڑھیں