لاہور (29 جنوری 2026): بھاٹی دروازہ کے علاقے میں ماں بیٹی کے سیوریج لائن میں گر کر جاں بحق ہونے کے افسوس ناک واقعے کا نوٹس لیتے ہوئے وزیر اعلیٰ مریم نواز نے متعلقہ افسران کو فوری معطل کر دیا۔
وزیر اعلیٰ پنجاب کی ہدایت پر غفلت کے مرتکب ایل ڈی اے پراجیکٹ ڈائریکٹر کو معطل کیا گیا ہے، سیکرٹری ہاؤسنگ نے پراجیکٹ ڈائریکٹر زاہد عباس کی معطلی کے احکامات جاری کر دیے۔
ترجمان محکمہ ہاؤسنگ پنجاب کے مطابق ڈائریکٹر ٹیپا شبیر حسین کو بھی غفلت اور نا اہلی پر معطل کر دیا گیا ہے۔
ڈی آئی جی فیصل کامران کے مطابق سیوریج لائن میں گرنے والی خاتون کی لاش مل گئی ہے، 24 سالہ سعدیہ کی لاش آؤٹ فال روڈ پر سیوریج لائن سے ملی ہے، جب کہ 10 ماہ کی ردا کی تلاش جاری ہے۔
لاہور: سیوریج لائن میں گرنے والی خاتون کی لاش مل گئی، بچی کی تلاش جاری
واقعے کی تحقیقات کے لیے اعلیٰ سطح کمیٹی بنا دی گئی ہے، کمیٹی تحقیقات کر کے 24 گھنٹے میں اپنی رپورٹ دے گی، ڈی آئی جی کے مطابق فیملی اگر مقدمہ درج کرانا چاہے گی تو مقدمہ درج کیا جائے گا۔
فیصل کامران کا کہنا تھا کہ پانی کا بہاؤ زیادہ ہونے کی وجہ سے لاش دور بہہ گئی تھی، اور اس وقت بچی کی تلاش کے لیے تمام ادارے مل کر کام کر رہے ہیں۔
اے آر وائی نیوز کی ڈیجیٹل ڈیسک کی جانب سے شائع کی گئی خبریں