لاہور: وزیراعلیٰ پنجاب مریم نواز نے پنجاب بھر میں اسکول کی عمارتوں کی چیکنگ اور خستہ حال عمارتوں میں بنے اسکولز سیل کرنے کا حکم دے دیا۔
تفصیلات کے مطابق پنجاب کی وزیراعلی مریم نواز نے پنجاب بھر میں اسکول بلڈنگز کی چیکنگ کا حکم دیتے ہوئے مخدوش اور خستہ حال عمارتوں میں بنے اسکول سیل کرنے اور اسکولوں میں صفائی کی صورتحال کی بھی چیکنگ کی ہدایت کی۔
وزیراعلی پنجاب کا کہنا تھا کہ عوامی امور پر نظر ہے، تمام مسائل حل کرنا چاہتے ہیں اور مجھے یقین ہے کچھ سالوں میں یہ شکایات برقرار نہیں رہیں گی میں شاباشی دینے میں کنجوسی نہیں کرتی، چیزوں کو بہتر کرنے کے لیے سخت رویہ اپنانا پڑتا ہے۔
مریم نواز نے کہا کہ پولیس عوام میں ریلیف اور مجرموں میں خوف کا احساس پیدا کرے، جرائم پیشہ افراد کیخلاف سخت ترین اور فیصلہ کن کارروائی کی جائے۔
دوسری جانب وزیر اعلیٰ پنچاب مریم نواز نے مظفر گڑھ کے ڈپٹی کمشنر آفس میں ارکان اسمبلی سے ملاقات کی، ارکان اسمبلی نے عوامی مسائل کے حل کے لیے تجاویز اور سفارشات پیش کیں۔
