لندن: مسلم لیگ (ن) کی سینئر نائب صدر مریم نواز کا کہنا ہے کہ پارٹی میں نئی ذمہ داریوں سے مزید متحرک ہو جاؤں گی۔
مریم نواز کی میڈیا سے گفتگو کے دوران ایک صحافی نے ان سے سوال پوچھا کہ آپ پنجاب کا الیکشن لڑنے جا رہی ہیں، وزیر اعلیٰ کے لیے بھی آپ کا نام آ رہا ہے۔
صحافی کے سوال کا جواب دیے بغیر مریم نواز مسکراتے ہوئے روانہ ہوگئیں۔
خیال رہے کہ مریم نواز 28 جنوری کو پاکستان پہنچیں گی۔ وفاقی وزیر اطلاعات و نشریات مریم اورنگزیب نے اپنے ایک ٹوئٹ میں بتایا تھا کہ مریم نواز 26 جنوری کو لندن سے روانہ ہوں گی اور 28 جنوری ہفتے کی رات 8 بجے لاہور پہنچیں گی۔
پاکستان مسلم لیگ(ن)کی سینئیر نائب صدر ،چیف آرگنائزر مریم نواز انشاءاللہ 26 جنوری کو لندن سے روانہ ہوں گی اور 28 جنوری،ہفتے کی شب 8 بجے لاہور پہنچیں گی۔الحمدللّٰہ آپ سب کی دعاؤں سے مریم نواز شریف سرجری کے بعد صحت یاب ہو کر وطن واپس آ رہی ہیں۔آپ سب کی دعاؤں اور نیک تمناؤں کا شکریہ
— Marriyum Aurangzeb (@Marriyum_A) January 23, 2023
پیر کے روز مسلم لیگ (ن) کے قائد نواز شریف کے ہمراہ میڈیا سے گفتگو میں مریم نواز نے کہا تھا کہ وزیر اعلیٰ محسن نقوی کی تقرری کے بعد عمران خان کا رونا شروع ہوگیا ہے، کسی کے نام پر اعتراض ہے تو فرح کو پنجاب کا نگراں وزیر اعلیٰ لگا دیں، پنجاب کو چلانے کا تجربہ فرح کے پاس ہے۔
اس دوران نواز شریف کا کہنا تھا کہ عمران خان کی باتوں کو چھوڑیں، انہوں نے پاکستان کو تباہ کرنے میں کوئی کسر نہیں چھوڑی۔
نواز شریف کا کہنا تھا کہ عمران خان پاکستان کے لیے قہرتھا، اس سے نجات حاصل کرنا ہر پاکستانی کی ذمہ داری ہے۔
