لاہور: چیئرمین سینیٹ اور ڈپٹی چیئرمین سینیٹ کے انتخاب سے قبل ایوان بالا سے خفیہ کیمروں کی موجودگی نے سیاسی ماحول کو مزید گرما دیا ہے ایسے میں مریم نواز بھی میدان میں آگئیں اور بڑا بیان جاری کردیا ہے۔
تفصیلات کے مطابق مسلم لیگ (ن) کی نائب صدر مریم نواز نے ایک بار پھر سماجی رابطے کی ویب سائٹ ٹوئٹر پر حکومت کو آڑے ہاتھوں لیا اور کہا کہ عادی، سند یافتہ ووٹ چور ہر بار ووٹ چوری کا نیا طریقہ ڈھونڈ کر لاتا ہے، اس بار کیمرے لگا کر اپنے ہی ارکان کی جاسوسی کرنی پڑگئی، ایسی تاریخی ذلت،توبہ۔
مریم نواز نے کہا کہ سپریم کورٹ سے منہ کی کھائی، آئینی ترمیم میں ناکام رہے اور اب آر ٹی ایس اور "ڈسکہ دھند” کے بعد سینیٹ پر ڈاکہ ڈالنے والے آخری جنگ ہار چکے۔
پارلیمنٹ اور اپوزیشن کے ووٹ چوروں کو NRO دینے سے انکار کے بعد، ECP اور سپریم کورٹ کے کندھے پر رکھ کر بندوق چلانے میں ناکامی کے بعد خفیہ کیمروں کے ذریعے آئین کی توہین ایک سنگین جرم ہے۔ سیلیکٹرز بھی سوچتے ہوں گے کیا مصیبت گلے پڑ گئی! نا اُگلے بن رہی ہے نا نگلے بن رہی ہے!
— Maryam Nawaz Sharif (@MaryamNSharif) March 12, 2021
ٹوئٹر پر اپنے پیغام میں مریم نواز کا کہنا تھا کہ صدارتی آرڈیننس ردی کا ٹکڑا بن گیا تو خفیہ کیمروں والے مستری لے آئے، آئین میں خفیہ ووٹ کا ذکر ہے خفیہ کیمروں کا نہیں، ووٹ چورو شرم کرو اور کرسی چھوڑو۔
واضح رہے کہ آج صبح مسلم لیگ ن کے مصدق ملک اور پیپلز پارٹی کے مصطفیٰ نواز کھوکھر نے سینیٹ میں چیئرمین اور ڈپٹی چیئرمین کے انتخاب کے لئے بنائے گئے بوتھ میں خفیہ کیمروں کے نصب ہونے کا انکشاف کیا تھا اور مبینہ خفیہ کیمروں کی تصاویر سوشل میڈیا پر وائرل کی تھی۔
آر ٹی ایس اور ڈسکہ دھند کے بعد سینیٹ پر ڈاکہ ڈالنے والے آخری جنگ ہار چکے۔ سپریم کورٹ سے منہ کی کھائی، آئینی ترمیم میں ناکام رہے،صدارتی آرڈینینس ردی کا ٹکڑا بن گیا تو خفیہ کیمروں والے مستری لے آئے۔ آئین میں خفیہ ووٹ کا ذکر ہے خفیہ کیمروں کا نہیں! ووٹ چورو شرم کرو اور کرسی چھوڑو!
— Maryam Nawaz Sharif (@MaryamNSharif) March 12, 2021
مبینہ خفیہ کیمروں کی برآمدگی کے ساتھ ہی اپوزیشن اور حکومت کے درمیان لفظی گولہ باری کا سلسلہ شروع ہوا جوکہ اب تک جاری ہے، حکومتی وزرا اسے اپوزیشن کی سازش قرار دے رہی ہے جبکہ اپوزیشن اتحاد پی ڈی ایم کا کہنا ہے کہ یہ حکومت کی چال ہے کیونکہ حکومت کو اپنے اراکین پر اعتماد نہیں ہے اور یہ اس کا گھناؤنہ فعل ہے۔
خفیہ کیمروں کی برآمدگی کے بعد سیکریٹری سینیٹ قاسم صمد نے پولنگ بوتھ میں خفیہ کیمروں کے معاملے کی تحقیقات کیلئے پارلیمانی کمیٹی تشکیل دیتے یقین دلایا کہ کیمرے کے معاملے کی مکمل شفاف انکوائری ہوگی۔
وفاقی وزیرفواد چوہدری نے سماجی رابطے کی ویب سائٹ ٹوئٹر پرسیکریٹری سینیٹ کی جانب سے کیمروں پر کمیٹی بنانے کی تصدیق کرتے ہوئے کہا اس سے پہلے مصدق ملک ،مصطفی نواز وائرنگ کو کیمرے سمجھ کر اکھاڑ دیں۔
عادی، سند یافتہ ووٹ چور ہر بار ووٹ چوری کا نیا طریقہ ڈھونڈ کر لاتا ہے مگر رنگے ہاتھوں پکڑا جاتا ہے۔ مگر اب حالت اتنی پتلی ہو چکی ہے کہ ایجنسیوں سے فون کروا کر،گن پوائنٹ پر ووٹ لینے سے بھی بات نہیں بنی اور کیمرے لگا کر اپنے ہی ارکان کی جاسوسی کرنی پڑ گئی۔ ایسی تاریخی ذلت! توبہ !
— Maryam Nawaz Sharif (@MaryamNSharif) March 12, 2021
