The news is by your side.

Advertisement

مریم نواز نے ضمانت پر رہائی کیلئے درخواست دائر کردی

لاہور : سابق وزیراعظم نواز شریف کی صاحبزادی مریم نواز نے ضمانت پر رہائی کیلئے درخواست دائر کردی، جس میں کہا چوہدری شوگرملز ریفرنس، منی لانڈرنگ کیس میں ضمانت منظور کی جائے۔

تفصیلات کے مطابق سابق وزیراعظم نواز شریف کی صاحبزادی اور مسلم لیگ ن کی نائب صدر مریم نواز نے منی لانڈرنگ کیس میں ضمانت پر رہائی کیلئے درخواست دائر کر دی ، درخواست لاہور ہائی کورٹ میں درخواست دائر کی گئی۔

درخواست میں مؤقف اختیار کیا گیا کہ مریم نواز ملک کے تین بار منتخب ہونے والے وزیراعظم کی بیٹی ہے، نواز شریف نے ملکی ترقی کیلئے بہت اقدامات کئے، مریم کا خاندان سیاسی تاریخ کا حامل ہے۔

دائر درخواست میں کہا گیا منی لانڈرنگ کا بے بنیاد کیس بنا کر سیاسی انتقام کا نشانہ بنایا جا رہا ہے، نیب کے قانون کی غلط استعمال کر کے گرفتار کیا گیا، تمام جائیدادیں اور اثاثے ڈکلیئر کر رکھی ہیں۔

درخواست میں استدعا کی گئی کہ چوہدری شوگرملزریفرنس،منی لانڈرنگ کیس میں ضمانت منظورکی جائے۔

یاد رہے احتساب عدالت نے چوہدری شوگرملزمنی لانڈرنگ کیس میں نیب کی مزید ریمانڈ کی استدعا مسترد کرتے ہوئے مریم نواز کو جوڈیشل ریمانڈ پر جیل بھجوادیا تھا۔

مزید پڑھیں : احتساب عدالت نے مریم نواز کا جوڈیشل ریمانڈ دے دیا

واضح رہے 8 اگست کو نیب نے چوہدری شوگرملز منی لانڈرنگ کیس میں مریم نوا ز کو تفتیش کے لئے بلایا گیا تھا لیکن وہ نیب دفترمیں پیش ہونے کے بجائے والد سے ملنے کوٹ لکھپت جیل چلی گئیں، مریم نواز ملاقات کر کےنکلیں تو نیب ٹیم نے انھیں گرفتار کرلیا تھا جبکہ نواز شریف کے بھتیجے یوسف عباس کو بھی گرفتار کیاتھا۔

Comments

comments

یہ بھی پڑھیں