ریاض: مقام مقدس مسجد حرام میں گزشتہ 60 برسوں میں کتنی تبدیلی ہوئی یہ پرانی تصاویر دیکھ کر اندازہ لگایا جاسکتا ہے، مسجد حرام کی ایسی نادر و نایاب تصاویر سامنے آتی رہتی ہیں جسے دیکھ کر موجودہ تعمیرات کا اندازہ ہوتا ہے لیکن اب 63 برس پرانی ایک رنگین تصویر جاری ہوئی ہے۔
العربیہ ڈاٹ نیٹ کے مطابق سوشل میڈیا پر تیزی سے مقبول ہونے والی تصاویر 63 سال پرانی ہے جسے 1954 میں بنایا گیا، تصویر میں دیکھا جاسکتا ہے کہ اُس وقت حرم کعبہ میں صحن، مطاف، حفاظتی دیوار اور بابِ بنو شیبہ موجود ہیں۔
حرم کعبہ کی 63 برس پرانی رنگین تصویر
تریسٹھ برس قبل صحنِ مطاف کے باہر حفاظتی دیوار بھی موجود تھی جسے مسجد حرام کے چار اہم مقامات سے مربوط کیا گیا تھا، مقامات اربعہ یعنی چار اہم مقامات الشافعی، الحنبلی، المالکی اور حنفی مسلک کی نمائندگی کرتے تھے تاہم اب انہیں ختم کرکے مطاف کو بڑھا دیا گیا ہے۔
خانہ کعبہ کی 63 برس پرانی بلیک اینڈ وائٹ تصویر
واضح رہے حرم کی پہلی تصویر 1880ء میں جاری کی گئی تھی جو بیلک اینڈ وائٹ تھی، اس تصویر میں صحن کعبہ اور مسجد حرام کے بعض اہم حصے شامل ہیں جو آج سے 137 برس قبل کی مسجد حرام کی کہانی بیان کرتے ہیں۔
حرم شریف کی دیگر پرانی نادر تصاویر
عرب ویب سائٹ سے بات کرتے ہوئے حرمین شریفین کے امور ماہر محی الدین الھاشمی نے بتایا کہ کہ ’راہداری عثمانیہ‘ کو موسم گرما میں نمازیوں کو سایہ فراہم کرنے چھت بچھائی گئی جس کے احکامات شاہ عبدالعزیز آل سعود نے جاری کیے تھے۔
الھاشمی نے مزید کہا کہ 63 برس پرانی نایاب تصوری میں عثمانی کوری ڈور کے ساتھ مسجد حرام کے مقامات اربعہ کے درمیان ریتلی جگہ کو بھی دیکھا جاسکتا ہے۔
سوشل میڈیا پر وائرل ہونے والی تصویر میں مسجد حرام کے چار اہم مقامات موجود ہیں جن میں مقامِ ابرہیم بھی شامل ہے جبکہ آب زمزم کی عمارت میں تصویر میں واضح نظر آرہی ہے، علاوہ ازیں صحنِ مطاف کو دو حصوں میں دیکھا جاسکتا ہے۔
