ابوظبی: متحدہ عرب امارات کی ریاست ابوظبی میں پولیس نے کارروائی کرتے ہوئے منشیات کی بڑی کھیپ پکڑلی۔
عرب میڈیا کے مطابق ابوظبی پولیس نے کارروائی کرتے ہوئے 430 کلو گرام ہیئروئن اور آئس ہیروئن برآمد کرلی، ہیروئن کو گاڑی کے مختلف پارٹس میں چھپایا گیا تھا۔
دوسری جانب پولیس نے ملک کے مختلف علاقوں میں کارروائی کرتے ہوئے 12 ایشیائی شہریوں کو بھی گرفتار کیا ہے جن کے قبضے سے 5 لاکھ منشیات کے کیپسول برآمد کرلیے گئے۔
کرنل طاہر ال داہری کا کہنا تھا کہ منشیات فروشوں نے نوجوانوں کو ٹارگٹ کیا ہوا ہے پولیس نے کارروائی کرتے ہوئے ان کے مذموم مقاصد ناکام بنائے۔
https://www.facebook.com/ADPoliceHQ/videos/392578308071814/
کرنل طاہر کے مطابق پولیس نے منشیات فروشوں کے خلاف آپریشن شروع کررکھا ہے جس کو ’پین فل‘ اسٹرائیک کا نام دیا گیا ہے، انہوں نے کہا کہ کارروائی کے دوران منشیات کی یہ دوسری بڑی کھیپ پکڑی گئی ہے۔
مزید پڑھیں: ابوظبی پولیس نے 2 ہزار کروڑ درہم مالیت کی منشیات ضبط کرلی
یاد رہے کہ رواں سال اپریل میں اماراتی پولیس نے انسداد منشیات مہم کے تحت سال 2018 کے دوران ضبط کی گئی 2 ہزار کروڑ درہم مالیت کی ایک ہزار کلو منشیات تلف کی تھی۔
پولیس نے گزشتہ برس اکتوبر میں ایک آپریشن کیا تھا جس میں پولیس نے 17 کلو منشیات ضبط کرکے 5 ایشیائی شہریوں کو گرفتار کیا تھا، ملزمان ملک بھر میں مبینہ طور پر نوجوانوں کو منشیات سپلائی کرتے تھے۔
