The news is by your side.

Advertisement

اداکارہ متھیرا کی شادی شدہ زندگی کیسی تھی؟

معروف ماڈل و اداکارہ متھیرا نے اپنی شادی شدہ زندگی کے بارے میں بتاتے ہوئے کہا کہ شادی کا رشتہ برقرار رکھنا دونوں فریقین کی ذمہ داری ہوتی ہے، کوئی ایک فریق اکیلا اس رشتے کو نہیں چلا سکتا۔

تفصیلات کے مطابق معروف اداکارہ متھیرا اے آر وائی نیوز کے پروگرام ہمارے مہمان کی مہمان بنیں۔ دوران گفتگو انہوں نے شادی شدہ زندگی سے متعلق اپنے خیالات شیئر کیے۔

متھیرا کا کہنا تھا کہ تشدد کرنے والے شوہر کے سدھرنے کی امید کرنا ایک قسم کی ذہنی غلامی ہے، ایک بار جب ہاتھ اٹھتا ہے تو وہ رکتا نہیں، اور تشدد کرنے والے کی عادت کبھی نہیں بدلتی۔

انہوں نے کہا کہ چونکہ مجھ پر بولڈ ہونے کی چھاپ تھی لہٰذا جب میری شادی ہوئی تو میں نے ایک عام گھریلو عورت سے دس گنا زیادہ کام کیے تاکہ کسی کو کچھ کہنے کا موقع نہ ملے۔

متھیرا کا کہنا تھا کہ شادی کو قائم رکھنے کے لیے ٹیم ورک کی طرح دونوں فریقین کو کوشش کرنی پڑتی ہے، صرف عورت کی قربانیوں یا برداشت سے یہ رشتہ نہیں چل سکتا، ایک کامیاب رشتہ وہی ہوتا ہے جس میں شامل تمام فریقین اس رشتے کو قائم رکھنے کی کوشش کریں۔

انہوں نے مزید کہا کہ ان کے خیال میں ایک کامیاب شادی کا راز ایک دوسرے کی عزت کرنے اور ایک دوسرے کا خیال رکھنے میں ہے۔

یاد رہے کہ متھیرا نے سنہ 2012 میں ایک گلوکار سے شادی کی تھی تاہم 2018 میں دونوں کے درمیان علیحدگی ہوگئی تھی، دونوں کا ایک بیٹا بھی ہے۔

Comments

یہ بھی پڑھیں