The news is by your side.

Advertisement

’’مولانا فضل الرحمان 27 اکتوبر کو بیرون ملک چلے جائیں گے‘‘

اسلام آباد: تحریک انصاف کے رہنما مفتی عبدالقوی نے کہا ہے کہ مولانا فضل الرحمان تحفظ ناموس رسالت کے نام پر بھیک مانگ رہے ہیں۔

تفصیلات کے مطابق تحریک انصاف کے رہنما مفتی عبدالقوی نے لاہور پریس کلب میں نیوز کانفرنس کرتے ہوئے کہا کہ زرد عمامہ پہن کر مولانا فضل الرحمان تحفظ ناموس رسالت کے نام پر بھیک مانگ رہے ہیں وہ  27 اکتوبر کے دن بیرون ملک علاج کروانے چلے جائیں گے۔

مفتی عبدالقوی کے مطابق مولانا چندہ مانگ کر شرمندگی کا باعث بن رہے ہیں، پانچ دن بعد مولانا فضل الرحمان کے مارچ کے خلاف ایک کمیٹی تمام سیاسی پارٹیوں کے پاس جائے گی۔

انہوں نے کہا کہ مولانا چندہ مانگ کر اپنے زرد رومال کی طرح چہرہ بھی زرد کررہے ہیں، انہوں نے انکشاف کیا کہ ناموس رسالت کے نام پر چندہ مانگنے سے بخار آتا ہے اور دل کا دورہ بھی پڑسکتا ہے۔

مزید پڑھیں: نواز شریف کا مولانا فضل الرحمان کے آزادی مارچ کی مکمل حمایت کا اعلان

مفتی عبدالقوی نے کہا کہ مولانا فضل الرحمان 25 اکتوبر تک چندہ مانگیں گے، 26 اکتوبر کو بیمار ہوں گے اور 27 اکتوبر کے دن وہ بیرون ملک علاج کروانے چلے جائیں گے۔

واضح رہے کہ گزشتہ روز مولانا فضل الرحمان نے آزادی مارچ کی تاریخ تبدیل کرنے کا اعلان کرتے ہوئے کہا تھا کہ آزادی مارچ 27 کو نہیں بلکہ 31 اکتوبر کو اسلام آباد میں داخل ہوگا۔

یاد رہے کہ گزشتہ روز پیپلزپارٹی کے چیئرمین بلاول بھٹو زرداری نے کہا تھا کہ مولانا فضل الرحمان کے آزادی مارچ کی حمایت جبکہ دھرنے کی مخالفت کریں‌ گے۔

مسلم لیگ ن کے قائد نواز شریف نے بھی مولانا فضل الرحمان کے آزادی مارچ کی حمایت کا اعلان کیا ہے تاہم شہباز شریف نے مارچ کی قیادت کرنے سے معذرت کرلی ہے۔

Comments

comments

یہ بھی پڑھیں