لندن: برطانوی وزراعظم تھریسامے نے کہا ہے کہ سعودی صحافی جمال خاشقجی کے قتل کی شفاف تحقیقات اور ان کے قاتلوں کو انصاف کے کٹہرے میں دیکھنا چاہتے ہیں۔
غیرملکی خبررساں ادارے کے مطابق برطانوی وزیراعظم تھریسامے نے بیونس آئرس آمد سے قبل طیارے میں صحافیوں سے گفتگو کرتے ہوئے کہا کہ سعودی ولی عہد شہزادہ محمد سلمان سے ملاقات میں مقتول صحافی جمال خاشقجی کے قتل اور یمن کے مسئلے پر گفتگو ہوگی۔
تھریسامے نے کہا کہ سعودی صحافی کے قتل کی شفاف تحقیقات ہونی چاہئے اور ملزمان کو جلد قانون کے مطابق سزا دینی چاہئے۔
برطانوی وزیراعظم نے کہا کہ یمن کی صورت حال پر گہری تشویش ہے، یمن کا طویل المدتی حل سیاسی مذاکرات میں ہے۔
واضح رہے کہ برطانوی وزیراعظم تھریسامے اور سعودی ولی عہد شہزادہ محمد بن سلمان کی جی 20 کانفرنس کے موقع پر ملاقات متوقع ہے۔۔
مزید پڑھیں: خاشقجی قتل کیس، کینیڈا نے 17 سعودی شہریوں پر پابندی عائد کردی
یاد رہے کہ 2 اکتوبر میں سعودی صحافی جمال خاشقجی استنبول میں سعودی سفارت خانے گئے تھے جہاں انہیں قتل کردیا گیا تھا۔
بیس اکتوبر کو سعودی عرب نے باضابطہ طور پر یہ اعتراف کیا تھا کہ صحافی جمال خاشقجی کو استنبول میں قائم سفارت خانے کے اندر جھگڑے کے دوران قتل کیا گیا۔