site
stats
سندھ

صفائی مہم میں ناکامی پر میئر کراچی جھوٹ بول رہے ہیں، سعید غنی

کراچی: پیپلزپارٹی کے سینیٹر سعید غنی نے کہا ہے کہ میئرکراچی صفائی مہم میں ناکامی کے بعد عوام سے جھوٹ بول کر انہیں دھوکا دینے کی کوشش کررہے ہیں، کچرے کی صفائی کا کام ڈی ایم سیز کے سپرد ہے، جو بلدیاتی نمائندوں کے ماتحت ہیں۔

کراچی میں میڈیا سے گفتگو کرتے ہوئے پی پی کے رہنماء نے کہا کہ کراچی میونسپل کارپوریشن میں ایم کیو ایم نے جعلی بھرتیاں کر کے ادارے کو تباہ کردیا، حکومت سندھ غیرقانونی بھرتیوں پر نوٹس لے کر لوگوں کو بے روزگار کرنا نہیں چاہتی۔

انہوں نے کہا کہ ’’متحدہ نے اپنے دور میں کراچی کی کوئی زمین نہیں چھوڑی اور نالوں پر غیرقانونی تعمیرات کر کے انہیں بھی فروخت کیا، میئر کراچی کو جتنے اختیارات دیے گئے ہیں وہ اس میں کام نہیں کررہے اور ایم کیو ایم اپنی ناکام صفائی مہم کا ملبہ سندھ حکومت پر ڈال رہی ہے جو ناکامی کی اعلیٰ ترین مثال ہے‘‘۔

یاد رہے میئر کراچی کی جانب سے شہر میں سو روزہ صفائی مہم کا اعلان کیا گیا تھا جس کی مدت چار روز قبل ختم ہوئی ہے، مہم کی اختتامی پریس کانفرنس پر وسیم اختر نے شہر میں صفائی نہ ہونے کا ذمہ دار حکومت سندھ کو قرار دیا اور کوڑے کرکٹ کے موجودہ ڈھیر کی اصل وجہ اختیارات نہ ہونے کو قرار دیا۔

میئر کراچی کی پریس کانفرنس کے جواب میں وزیراعلیٰ نے تمام الزامات کو مسترد کرتے ہوئے کہا تھا کہ ’’وسیم اختر کو آئین کے مطابق تمام اختیارات دیے گئے ہیں اور حکومت مزید ایسے اختیارات نہیں دے سکتی جس کے ذریعے شہر میں دوبارہ چائنا کٹنگ کا رواج عام ہوجائے کیونکہ متحدہ نے بلدیاتی ادوار میں سرکاری اراضی پر قبضے کیے جس میں میئر بھی ملوث رہے ہیں‘‘۔

Print Friendly, PDF & Email
20

Comments

comments

اس ویب سائیٹ پر موجود تمام تحریری مواد کے جملہ حقوق@2018 اے آروائی نیوز کے نام محفوظ ہیں

To Top