The news is by your side.

Advertisement

ملک میں بلدیاتی انتخابات کا انعقاد خطرے میں پڑ گیا

اسلام آباد: پرنٹنگ کارپوریشن پاکستان میں منیجنگ ڈائریکٹر کی عدم تعیناتی سے تمام معاملات التوا کا شکار ہو گئے، ملک میں بلدیاتی انتخابات کا انعقاد بھی خطرے میں پڑ گیا۔

اے آر وائی نیوز کے مطابق پرنٹنگ کارپوریشن میں ایم ڈی کی عدم تعیناتی سے گلگت بلتستان میں انتخابات اور بیلٹ پیپر کی چھپائی خطرے میں پڑ گئی ہے، ملک میں بلدیاتی انتخابات کا انعقاد بھی خطرے میں پڑ گیا۔

ذرایع کا کہنا ہے کہ الیکشن کمیشن کے ساتھ الیکشن کے تمام معاملات ایم ڈی کی ذمہ داری ہوتی ہے، ایم ڈی پرنٹنگ کارپوریشن پاکستان کی عدم تعیناتی سے تمام معاملات التوا کا شکار ہو گئے ہیں۔

سیکریٹری کابینہ اور سیکریٹری اسٹیبلشمنٹ بھی تاحال ایم ڈی پی سی پی کی سمری بھیجنے میں ناکام رہے، ذرایع کا کہنا ہے کہ ڈائریکٹر فنانس، سیکریٹری، ڈپٹی سیکریٹری، آڈٹ آفیسر، اور جنرل منیجر کی آسامیاں بھی خالی ہیں۔

الیکشن کمیشن نے سندھ میں بلدیاتی حلقہ بندیوں کیلئے کمیٹیوں کا اعلان کر دیا

ذرایع نے مزید بتایا کہ پرنٹنگ کارپوریشن میں ایم ڈی کی عدم تعیناتی سے ملازمین کے واجبات بھی ادا نہیں ہو سکے ہیں۔

ادھر آج الیکشن کمیشن نے سندھ میں بلدیاتی حلقہ بندیوں کے لیے کمیٹیوں کا اعلان کر دیا ہے، نئی حلقہ بندیوں کے بعد سندھ میں بلدیاتی الیکشن کا انعقاد ہوگا، جس کے لیے تیاریاں جاری ہیں۔

الیکشن کمیشن کا کہنا ہے کہ 9 سے 22 ستمبر تک سندھ بھر میں بلدیاتی حلقہ بندیوں کو مکمل کیا جائے گا، 23 ستمبر کو سندھ میں ابتدائی حلقہ بندیاں آویزاں کی جائیں گی اور حلقہ بندیوں کے بعد بلدیاتی انتخابات کے شیڈول کا اعلان ہوگا۔

Comments

یہ بھی پڑھیں