The news is by your side.

ایم ڈی کیٹ کے خلاف ڈی چوک پر طلبہ کا دھرنا چوتھے روز میں داخل

اسلام آباد: ایم ڈی کیٹ امتحان کے خلاف ڈی چوک پر طلبہ کا دھرنا چوتھے روز میں داخل ہو گیا۔

تفصیلات کے مطابق ایم ڈی کیٹ امتحان کے سلسلے میں طلبہ کئی دنوں سے سراپا احتجاج ہیں، اور انھوں نے اسلام آباد کے مشہور ڈی چوک پر دھرنا دے رکھا ہے۔

مظاہرے میں ایم ڈی کیٹ امتحان دینے والے طلبہ شریک ہیں، مظاہرین حکومت اور پاکستان میڈیکل کمیشن انتظامیہ کے خلاف نعرے لگا رہے ہیں۔

مظاہرین کا مؤقف ہے کہ پی ایم سی کی ناقص پالیسی نے طلبہ کا مستقبل داؤ پر لگا دیا ہے، وہ کئی دنوں سے یہ مطالبہ کر رہے ہیں کہ پاکستان میڈیکل کمیشن ایم ڈی کیٹ ٹیسٹ کا دوبارہ انعقاد کرے۔

مظاہرین کا کہنا ہے کہ ایم ڈی کیٹ ٹیسٹ لینے والی فرم نے امتحان کے دوران ناقص انتظامات کیے تھے، جس کے باعث بڑی تعداد میں طلبہ ناکام ہو گئے۔

مظاہرین کا کہنا ہے کہ اگر ان کے مطالبات تسلیم نہیں کیے گئے تو وہ پارلیمنٹ کی طرف مارچ کریں گے، احتجاجی طلبہ نے آج پارلیمنٹ جانے کی کوشش بھی تاہم پولیس نے انھیں روک دیا، طلبہ احتجاج کے پیش نظر ڈی چوک پر پولیس کی بھاری نفری تعینات ہے۔

واضح رہے کہ پی ایم سی کی نااہلی اور ٹیسٹ میں بے ضابطگیوں کے خلاف اسلام آباد میں گزشتہ کئی روز سے طلبہ سراپا احتجاج ہیں، اور ان کا ایک ہی مطالبہ ہے کہ ٹیسٹ ایک دن اور دوبارہ لیے جائیں۔

ایم ڈی کیٹ امتحان ایک دن کی بجائے ایک ماہ پر طویل کر دیا گیا تھا، کچھ طلبہ سے یکم اگست اور کچھ سے یکم ستمبر کو ٹیسٹ لیا گیا تھا جس کی وجہ سے سب کو تیاری کا یکساں موقع نہ مل سکا، جب کہ دونوں پیپرز میں بھی فرق تھا، ایک بیج کے لیے ٹیسٹ آسان تھا، تو دوسرے بیج کو مشکل ٹیسٹ کے مرحلے سے گزارا گیا۔

Comments

یہ بھی پڑھیں