لاہور: پنجاب انسیٹیوٹ آف کارڈیالوجی میں زیر علاج سابق کرکٹر توصیف احمد کے مزید علاج کے لئے میڈیکل بورڈ تشکیل دے دیا گیا ہے۔
دو روز قبل قومی ٹیم کے سابق کھلاڑی توصیف احمد کو دل کا دورہ پڑنے پر نجی اسپتال منتقل کیا گیا تھا، جہاں انہیں طبی امداد دینے کے بعد ضروری ٹیسٹ کئے گئے۔
ذرائع ڈاکٹرز کا کہنا ہے کہ توصیف احمد کی گذشتہ روز نجی اسپتال میں انجیوگرافی بھی کی گئی تھی، انجیو گرافی رپورٹ کے مطابق سابق کرکٹر کے دل کی تین نالیوں میں مسائل کی نشاندہی ہوئی ہے، جس کے بعد توصیف احمد کےمزید علاج کیلئے میڈیکل بورڈ تشکیل دے دیا گیا ہے۔
ذرائع ڈاکٹرز کے مطابق میڈیکل بورڈ توصیف احمد کےعلاج معالجہ کا فیصلہ کرےگا اور نجی اسپتال کی انجیوگرافی کی سی ڈی کےذریعے میڈیکل بورڈ مزید فیصلہ کرےگا۔
یہ بھی پڑھیں: سابق کرکٹر توصیف احمد دل کا دورہ پڑنے پر اسپتال منتقل
واضح رہے کہ دو روز قبل توصیف احمد شادی کی تقریب میں شرکت کے لیےکراچی سےلاہور آئے ہوئے ہیں، شادی کی تقریب کے دوران ہی انہیں دل کا دورہ پڑا تھا، جس پر انہیں طبی امداد کے لیے اسپتال منتقل کیا گیا تھا۔
یاد رہے کہ 62 سالہ توصیف احمد نے آف اسپنر کی حیثیت سے34 ٹیسٹ اور 70 ایک روزہ میچوں میں پاکستان کی نمائندگی کی اور بالترتیب 93 اور 55 وکٹیں حاصل کیں۔
