اسلام آباد: وزیراعظم عمران خان کا کہنا ہے کہ اپوزیشن کا فوکس ملکی مفاد نہیں بلکہ شریف خاندان کے مقدمات سے چھٹکارا حاصل کرنا ہے، ان کی بلیک میلنگ میں نہیں آئیں گے۔
اے آر وائی نیوز کی رپورٹ کے مطابق وزیراعظم کی زیر صدارت پارلیمنٹ میں ترجمانوں کا اجلاس ہوا، پارلیمنٹ میں قانون سازی سے متعلق ترجمانوں کو بریفنگ دی گئی۔
ذرائع کے مطابق اجلاس میں موجودہ صورتحال میں اپوزیشن کے بیانیہ سے متعلق حکمت عملی پر مشاورت کی گئی، نواز شریف کو وطن واپس لانے سے متعلق حکومتی حکمت عملی پر مشاورت کی گئی۔
قومی اسمبلی میں ایف اے ٹی ایف قوانین منظوری سے متعلق حکمت عملی پر تبادلہ خیال کیا گیا، ترجمان کو ملکی معاشی صورتحال میں بہتری کو موثر طور پر اجاگر کرنے کی ہدایت کی گئی۔
مزید پڑھیں: پاکستان کی معیشت درست راہ پر گامزن ہے، وزیراعظم
وزیراعظم عمران خان نے کہا کہ عدالتوں کو مطلوب افراد کو واپس لانا حکومت کی ذمہ داری ہے، مسلم لیگ ن نے نواز شریف کی صحت پر سیاست کی، نواز شریف کی واپسی کے لیے تمام قانونی ذرائع استعمال میں لائے جائیں۔
عمران خان نے کہا کہ معیشت سے متعلق فیصلوں کے ثمرات آنا شروع ہوگئے ہیں اب پوری توجہ بہتر معاشی اشاریوں کے ثمرات عوام تک پہنچانے پر ہے۔
واضح رہے کہ اس سے قبل وزیراعظم عمران خان نے سماجی رابطے کی ویب سائٹ ٹوئٹر پر اپنے پیغام میں کہا تھا کہ پاکستان کی معیشت،ماشااللہ درست راہ پر گامزن ہے، جولائی2019 میں613 ملین ڈالر خسارہ ہوا، جون2020 میں 100 ملین ڈالرخسارے کے بعد صورتحال سنبھل گئی۔
