لاس اینجلس: شاہی خاندان کی نوبیاہتا بہو میگھن مارکل کے والد کا کہنا ہے کہ بیٹی کی شادی ٹیلی ویژن پر دیکھی جو بہت تکلیف دہ تھی افسوس ہے کہ میں بطور والد شادی میں شرکت نہ کرسکا۔
تفصیلات کے مطابق شاہی خاندان کے چھوٹے نواب پرنس ہیری اور امریکی اداکارہ آج مذہبی رسومات کے بعد باقاعدہ ازدواجی بندھن میں بند گئے اور نوبیاہتا جوڑے نے آئندہ کی زندگی ساتھ گزارنے کا عہد کیا۔
شاہی خاندان کی شادی میں شرکت ہر شخص کی خواہش تھی تاہم نئی نویلی دلہن کے والد علالت کے باعث اپنی ہی بیٹی کی شادی میں شرکت نہ کرسکے کیونکہ انہیں ڈاکٹر نے آرام کرنے کا مشورہ دیا تھا۔
مزید پڑھیں: شہزادہ ہیری اور میگھن مرکل رشتہ ازدواج میں منسلک ہوگئے
میگھن مارکل کے والد نے شادی کی تقریبات ٹیلی ویژن پر دیکھیں اور عدم شرکت پر دکھ اور تکلیف کا اظہار کیا جسے یقیناً ہر باپ محسوس کرسکتا ہے کیونکہ اولاد کی خوشی میں شرکت کرنا گھر کے سربراہ کی دیرینہ خواہش ہوتی ہے۔
شاہی خاندان کی نوبیاہتا بہو کے والد کا کہنا تھا کہ ’میری بیٹی بہت خوبصورت اور خوش لگ رہی تھی، دعا ہے کہ وہ ہمیشہ خوش رہے اور اُسے اسی طرح پیار ملتا رہے‘۔
امریکی ویب سائٹ سے گفتگو کرتے ہوئے میگھن کے والد کا کہنا تھا کہ یہ مرحلہ میرے لیے تکلیف دہ ضرور ہے مگر یقیناً یہ موقع میرے لیے خوشی کا باعث بھی ہے کیونکہ میری بیٹی دلہن بنی اور اُس نے اپنی نئی زندگی کا آغاز کیا۔
یہ بھی پڑھیں: شاہی خاندان کی شادی تنازع کا شکار، میگھن کی تصدیق
واضح رہے کہ میگھن مارکل کے والد کی دل کی سرجری ہوئی جس کے باعث ڈاکٹرز نے انہیں سفر کرنے سے منع کیا تھا، گزشتہ روز شاہی خاندان کی جانب سے جاری ہونے والے اعلامیے میں امریکی اداکارہ نے والد کی عدم شرکت صحت کی وجہ ہی بتائی تھی۔
