The news is by your side.

Advertisement

اردو کی تضحیک : قومی اسمبلی میں محمود خان اچکزئی کیخلاف مذمتی قرار داد جمع

اسلام آباد : ایم کیو ایم کے اراکین قومی اسمبلی نے محمود خان اچکزئی کی جانب سے قومی زبان اردو کی تضحیک کیخلاف قرارداد جمع کرادی، جس میں کہا گیا ہے کہ ان الفاظ کی مذمت کی جائے۔

قومی اسمبلی کا اجلاس آج اسد قیصر کی زیر صدارت ہوا اس موقع پرایم کیو ایم پاکستان کے اراکین اسمبلی نے گزشتہ دونوں کراچی میں ہونے والے پی ایم ڈی کے جلسے میں پشتونخوا ملی عوامی پارٹی کے چیئرمین محمود خان اچکزئی کی تقریر میں کہے گئے الفاظ پر اپنے غم و غصے کا اظہار کیا۔

ایم کیو ایم پاکستان کے اراکین قومی اسمبلی نے محمود خان اچکزئی کی جانب سے قومی زبان اردو کی تضحیک کیخلاف اسپیکر قومی اسمبلی کو مذمتی قرارداد جمع کرائی۔

اراکین اسمبلی کا کہنا تھا کہ محمود خان اچکزئی نے اردو زبان کیخلاف جوالفاظ استعمال کئے وہ انتہائی ناقابل برداشت ہیں،
قومی اسمبلی کا ایوان قومی زبان کیخلاف ہرزہ سرائی پر محمود اچکزئی کی بھرپور مذمت کرے۔

قرار داد کے متن میں کہا گیا ہے کہ آئین پاکستان میں قومی زبان کو مکمل تحفظ فراہم کیا گیا ہے، آئین کے مطابق محمود اچکزئی کیخلاف کارروائی کی جائے۔

Comments

یہ بھی پڑھیں