واشنگٹن: ڈونلڈ ٹرمپ کے نئے امریکی صدر منتخب ہوتے ہی میلانیا خاتون اول تو بن گئی لیکن انھیں دو صدیوں بعد پہلی غیر ملکی خاتون اول کا اعزاز بھی حاصل ہوگیا ہے۔
امریکہ کے نئے صدر ڈونلڈ ٹرمپ کی اہلیہ میلانیا پیشے کے لحاظ سے سپر ماڈل رہ چکی ہیں، یہاں یہ بات قابل ذکر ہے کہ میلانیا ٹرمپ کو دو صدیوں بعد پہلی غیر امریکی خاتون اول کا اعزاز حاصل ہوگیا ہے۔
یہی نہیں انھیں پہلی مرتبہ کسی امریکی صدر کی تیسری بیوی ہونے کا اعزاز بھی حاصل ہے۔
اس سے قبل یہ اعزاز لوئسا ایڈمز کے پاس تھا، وہ امریکہ کے چھٹے صدر جان کوئنسی ایڈمز کی اہلیہ تھیں، جان کوئنسی ایڈمز منصب صدارت پر 04 مارچ1825ء تا 04مارچ1829ء تک فائز رہے ، وہ ڈیموکریٹک پارٹی کے پہلے صدر تھے۔
میلانیا ٹرمپ نے اپنے شوہر کی انتخابی مہم میں کچھ خاص دلچسپی نہیں لی لیکن ٹرمپ کی 2005 کی ویڈیو منظرعام پر آنے کے بعد پہلی مرتبہ میلانیا ٹرمپ کا امریکی ٹی وی سے گفتگو میں کہنا تھا کہ انہیں ٹرمپ کے الفاظ سے شدید دھچکا پہنچا تاہم ٹرمپ کے معافی مانگنے پر انہوں نے ٹرپ کو معاف کردیا ہے۔
میلانیا ٹرمپ نے کہا کہ ان کے خاوند نرم دل اور جنٹل مین انسان ہیں۔
میلانیا نے انٹرویو کے دوران کہا کہ میں جانتی ہوں کہ وہ خواتین کی عزت کرتے ہیں،لیکن وہ اپنا دفاع کر رہے ہیں کیوں کہ یہ سب جھوٹ ہے۔یہ اسکینڈل ہلیری کلنٹن کی ٹیم اور میڈیا نے ٹرمپ کی امیدواری کو نقصان پہنچانے کی خاطر کھڑا کیا ہے۔
ٹرمپ کی اہلیہ میلانیا ٹرمپ پر الزام لگایا کہ انھوں نے اپنی پہلی تقریر میں خاتون اول مشیل اوباما کی تقریر کے الفاظ استعمال کی۔
میلانیا ٹرمپ 26اپریل 1970ءکو”سوشلسٹ فیڈرل ریپبلک یوگوسلاویہ، سلوانیہ میں پیدا ہوئیں، انھوں نے ابتدائی تعلیم آبائی علاقے سے ہی حاصل کی، پیشے کے لحاظ سے میلانیا جیولری اور گھڑیوں کی ڈیزائنر ہونے کے ساتھ ساتھ ماضی میں سپر ماڈل رہ چکی ہیں ۔
میلانیا 2005ءمیں ارب پتی امریکی تاجر ڈونلڈ ٹرمپ کے ساتھ رشتہ ازدواج میں منسلک ہوئیں ،جس سے ان کا ایک بیٹا بیرون ولیم ٹرمپ ہے۔
ملانیا ٹرمپ نے مارچ 2001 میں "گرین کارڈ” حاصل کیا اور 2006 میں وہ امریکی شہری بن گئیں۔
