چترال : خیبر پختونخواہ کے سب سے بڑے ضلع چترال کے عوام کو ایک بار پھر سے پگھلتے گلیشیئر سے خطرہ لاحق ہو گیا ہے۔
تفصیلات کے مطابق خیبرپختونخوا میں صوبائی ڈیزاسٹرمینجمنٹ اتھارٹی کی جانب سے الرٹ جاری کردیا گیا ہے، جس میں کہا گیا ہے کہ چترال میں گلیشیئرز پگھلنے کا خطرہ ہے، جس سے ندی نالوں میں سیلاب آنے کا خدشہ ہے۔
پی ڈی ایم اے کے مطابق گلیشیئر کا پگھلاؤ مزید 3سے 4دن جاری رہے گا، جس سے چترال اور گلگت بلتستان کا درجہ حرارت 5 ڈگری سینٹی گریڈ تک بڑھ سکتا ہے۔
پی ڈی ایم اے نے ہدایت کی ہے کہ اس لئے دریاؤں اورندی نالوں کے قریب آبادی محتاط رہے، انتظامی ادارے عوام کے جان و مال کے تحفظ کیلئے ہر ممکن اقدامات کو یقینی بنائیں۔
خیال رہے موسمیاتی تبدیلی کے حوالے سے چترال سب سے پر خطر علاقہ تصور کیا جاتا ہے یہاں کے عوام کو گلیشیئر پگھلنے کی وجہ سے سیلابی صورت حال کا سامنا کرنا پڑتا ہے ، 2015 میں بھی پانچ لاکھ آبادی والی اس وادی کو سیلاب کی تباہ کاریوں کا سامنا کرنا پڑا تھا۔
