میمو کیشن کیس سماعت کے لیے مقرر memo commission case set for hearing
The news is by your side.

Advertisement

میمو کمیشن کیس سپریم کورٹ میں‌ سماعت کے لیے مقرر

اسلام آباد: میمو کمیشن کیس سماعت کے لیے مقرر کرلیا گیا ہے، سماعت 30 اگست کو چیف جسٹس کی سربراہی میں تین رکنی بنچ کرے گا۔

تفصیلات کے مطابق میمو کمیشن کیس سماعت کے لیے مقرر کرلیا گیا، سماعت 30 اگست کو چیف جسٹس کی سربراہی میں تین رکنی بنچ کرے گا، ڈی جی ایف آئی اے، اٹارنی جنرل اور دیگر فریقین کو نوٹس جاری کردئیے گئے۔

حسین حقانی کی واپسی سے متعلق ڈی جی ایف آئی اے رپورٹ پیش کریں گے، مقدمے کے فریق سابق وزیراعظم نواز شریف کو بھی نوٹس جاری کردیا گیا، مقدمے میں مسلم لیگ (ن) کے اکثر رہنما 2011 میں درخواست گزار ہیں۔

یا د رہے کہ میموگیٹ اسکینڈل 2011 میں اس وقت سامنے آیا تھا جب پاکستانی نژاد امریکی بزنس مین منصور اعجاز نے یہ دعویٰ کیا تھا کہ انہیں حسین حقانی کی جانب سے ایک پیغام موصول ہوا جس میں انہوں نے ایک خفیہ میمو اس وقت کے امریکی ایڈمرل مائیک مولن تک پہنچانے کا کہا۔

حسین حقانی پر یہ الزام عائد کیا جاتا ہے کہ ایبٹ آباد میں اسامہ بن لادن کی ہلاکت کے لیے کیے گئے امریکی آپریشن کے بعد پاکستان میں ممکنہ فوجی بغاوت کو مسدود کرنے کے سلسلے میں حسین حقانی نے واشنگٹن کی مدد حاصل کرنے کے لیے ایک میمو بھیجا تھا۔

اس اسکینڈل کے بعد حسین حقانی نے بطور پاکستانی سفیر اپنے عہدے سے استعفیٰ دے دیا تھا اور اس کی تحقیقات کے لیے ایک جوڈیشل کمیشن تشکیل دیا گیا تھا۔

جوڈیشل کمیشن نے اپنی رپورٹ میں کہا تھا کہ میمو ایک حقیقت تھا اور اسے حسین حقانی نے ہی تحریر کیا تھا۔رپورٹ میں مزید کہا گیا تھا کہ حسین حقانی نے میمو کے ذریعے امریکا کو نئی سیکورٹی ٹیم کے قیام کا یقین دلایا اور وہ خود اس سیکورٹی ٹیم کا سربراہ بننا چاہتے تھے۔

Comments

comments

یہ بھی پڑھیں