The news is by your side.

Advertisement

شہباز گل پر انڈا اور سیاہی پھینکنے والے ملزمان جسمانی ریمانڈ پر پولیس کے حوالے

لاہور : وزیر اعظم کے معاون خصوصی ڈاکٹر شہباز گل پر انڈا اور سیاہی پھینکنے والے ملزمان کو تین روزہ جسمانی ریمانڈ پر پولیس کے حوالے کردیا گیا۔

تفصیلات کے مطابق لاہور میں وزیر اعظم کے معاون خصوصی ڈاکٹر شہباز گل پر انڈے اور سیاہی پھینکنے والے ملزمان غلام عباس، چوہدری عتیق اور طارق جنید جٹ کو عدالت میں پیش کیا گیا۔

پراسیکیوشن نے بتایا کہ ملزمان نے گزشتہ روز شہباز گل پر گندے انڈے اور سیاہی پھینکی، سیاہی سے شہباز گل کی آنکھ متاثر ہوئی ، ملزمان صحافیوں کے روپ میں شہباز گل پر حملہ آور ہوئے۔

سرکاری وکیل نے استدعا کی کہ ملزمان سے صحافیوں کے جعلی کارڈ برآمد کرنے ہیں، ریمانڈ دیا جائے، جس پر وکیل صفائی کا کہنا تھا کہ ایف آئی آر من گھڑت ہے، ملزمان صحافی نہیں، سیاسی کارکن ہیں، ملزمان کےپاس جوکچھ تھا وہ پولیس کی تحویل میں ہے۔

وکیل صفائی نے کہا انڈےاور سیاہی استعمال ہو گئی تھی، اب پولیس کیا برآمدکرنا چاہتی ہے، دفعہ 419 کے علاوہ تمام دفعات قابل ضمانت ہیں، عدالت ضمانت منظور کرے۔

بعد ازاں عدالت نے شہباز گل پر انڈا اور سیاہی پھنیکنے والے ملزمان کو تین روزہ جسمانی ریمانڈ پر پولیس کے حوالے کردیا۔

Comments

یہ بھی پڑھیں