The news is by your side.

Advertisement

آپ اپنی ذہنی صلاحیت کیسے بڑھا سکتے ہیں، جانیے نہایت آسان طریقہ

ٹورنٹو: انسان اگر دماغی طور پر کمزور ہو تو دنیا میں آگے بڑھنے یا روشن مستقبل کا تصور تک ممکن نہیں مگر ذہنی صلاحیت کو عروج پر پہنچانے کے لیے کوئی جادوئی گولی بھی دستیاب نہیں۔

تاہم کچھ عام سی عادات یا عمل ایسے کارآمد ہیں جو ضرور یہ کمال کرسکتی ہیں اور جن کا ہمارے دماغ کو مظبوط بنانے میں اہم کردار ہوسکتا ہے۔

کینیڈا میں ایک نئی تحقیق میں یہ بات سامنے آئی ہے کہ اپنی مادری زبان کے علاوہ کوئی دوسری زبان سیکھنے کا عمل ہمارے دماغ کو مضبوط بنانے کے ساتھ ہماری اکتسابی (سیکھنے سے متعلق) صلاحیتوں میں بھی بہتری لاتا ہے۔

ماضی میں کی گئی کئی تحقیقات سے یہ معلوم ہوچکا ہے کہ بیک وقت دو زبانوں پر عبور رکھنے والے لوگ، ایک زبان سے واقفیت رکھنے والوں کے مقابلے میں زیادہ ذہین ہوتے ہیں اور ان میں دماغی بیماریاں بھی خاصی دیر میں نمودار ہوتی ہیں۔

بڑھاپے میں دماغ مضبوط رکھنے کیلئے دوسری زبان سیکھیں - HTV Pakistan

البتہ یہ واضح نہیں تھا کہ بڑی عمر میں کوئی دوسری زبان سیکھنے کے ذہن پر کیا اثرات ہوتے ہیں۔ یہ جاننے کے لیے ٹورنٹو کینیڈا کی یارک یونیورسٹی اور "بے کریسٹ” نامی نجی ادارے نے 65 سے 75 سال کے 76 رضاکار بھرتی کیے۔

ان میں سے آدھی تعداد کو دماغی تربیت کرنے والی ایپ (برین ٹریننگ ایپ) دی گئی جبکہ باقی نصف کو ایک اور موبائل ایپ کے ذریعے ہسپانوی زبان سکھائی گئی جو وہ اس سے پہلے نہیں جانتے تھے۔

دوران تربیت تمام رضاکاروں نے 16 ہفتے تک روزانہ 30 منٹ کے لیے یہ ایپس استعمال کیں جس کے بعد ان میں دماغی صلاحیتوں کا جائزہ لیا گیا۔

ہسپانوی زبان سیکھنے والے رضاکاروں کی یادداشت، تجزیئے اور فیصلہ سازی سے متعلق صلاحیتیں نمایاں طور پر بہتر رہیں جبکہ ان کا کہنا تھا کہ انہیں نئی زبان سیکھنے میں بہت لطف آیا۔

ریسرچ جرنل "ایجنگ، نیوروسائیکالوجی، اینڈ کوگنیشن‘ کے تازہ شمارے میں شائع ہونے والی اس تحقیق کے مرکزی مصنف ڈاکٹر جیڈ میلٹزر کہتے ہیں کہ نئی زبان سیکھنا اپنے آپ میں ایک دلچسپ سرگرمی ہے جو غیر محسوس انداز میں دماغ کو زیادہ فائدہ پہنچاتی ہے۔

مطالعے کے دوران یہ رضاکار ہسپانوی زبان میں ماہر تو نہیں بن لیکن پھر بھی ان کی اکتسابی صلاحیتیں خاصی بہتر ہوگئیں۔ اس سے ظاہر ہوتا ہے کہ عمر کے کسی بھی حصے میں نئی زبان سیکھ کر دماغ کو مضبوط اور صحت مند بنایا جاسکتا ہے۔

Comments

یہ بھی پڑھیں