ریاض: سعودی عرب میں ایک دل دہلا دینے والا واقعہ پیش آیا ہے، ایک ذہنی مریض نے اپنے پورے گھرانے کو زندہ جلا دیا۔
تفصیلات کے مطابق سعودی عرب کے شہر صفویٰ میں ایک شخص نے اپنے خاندان کے چار افراد کو زندہ جلا دیا جس سے تمام افراد جھلس کر جاں بحق ہوگئے۔
واقعے کی چھان بین کے بعد محکمہ پولیس نے کہا ہے کہ آتش زدگی حادثہ نہیں تھا بلکہ اس میں خاندان ہی کا ایک فرد شامل تھا، جس نے اپنے ماں، باپ، بہن بھائی کو ایک کمرے میں بند کیا اور پھر انھیں آگ لگا دی۔
واقعے میں 30 سالہ ملزم خود بھی آگ لگنے سے معمولی طور پر متاثر ہوا ہے، یہ بھی معلوم ہوا کہ وہ ذہنی مریض ہے، تاہم پولیس رواں ہفتے پیش آنے والے اس الم ناک واقعے کے مشتبہ ملزم کو گرفتار کر لیا ہے، اور پولیس کی موجودگی میں اس کا علاج کیا جا رہا ہے۔
پولیس حکام کا کہنا ہے کہ ملزم نے خاندان کے تمام افراد کو ایک کمرے میں بند کر دیا تھا، اور باہر نکلنے کے تمام راستے بند کر دیے تھے۔
پولیس کے مطابق آگ میں جھلس جانے کے باعث تمام افراد کی لاشیں بری طرح متاثر ہو گئی تھیں۔
