اے آر وائی ڈیجیٹل کے معروف ڈرامے ’میرے پاس تم ہو‘ میں رومی کا کردار ادا کرنے والے چائلڈ اسٹار شیس سجاد گل نے شوٹنگ کے دوران پیش آنے والے دلچسپ تجربات شیئر کردیے۔
میرے پاس تم ہو سے ڈرامہ انڈسٹری میں ڈیبیو کرنے والے چائلڈ اسٹار نے اداکاری کے جوہر دکھا کر پہلے ہی مرحلے میں کامیابی کی بلندی کو چھو لیا اور اُن کا مستقبل مزید روشن نظر آرہا ہے۔
اپنے حالیہ انٹرویو میں شیس سجاد کا کہنا تھا کہ ’ہمایوں سعید اور میرے والد آپس میں دوست ہیں، میری اُن سے ملاقات آڈیشن کے روز ہوئی اور انہوں نے بہت سپورٹ کیا‘۔ سجاد گل نے کارڈ گیم کھیلتے ہوئے شوٹنگ کے دوران پیش آنے والے خوش گوار واقعات بھی سنائے۔ انہوں نے بتایا کہ ہمایوں انکل میرے لیے کھلونے اور عائزہ خان میرے لیے چاکلیٹس لاتی تھیں۔
انہوں نے بتایا کہ شوٹنگ کے بعد وہ اسکول جاتے تھے، انہیں ایک آئی پیڈ دیا ہوا تھا جس پر وہ فارغ وقت میں نیٹ فلکس کے ڈرامے دیکھتے اور گیمز کھیلتے تھے۔
مزید پڑھیں: ڈرامہ سیریل ’میرے پاس تم ہو‘ نے ایک اور اعزاز اپنے نام کرلیا
شیس نے بتایا کہ ڈائیلاگ یاد کروانے میں اسسٹنٹ ڈائریکٹر نے بہت زیادہ ساتھ دیا، مجھے رومن میں لکھے ڈائیلاگز ملتے تھے جنہیں یاد کرنا آسان رہتا تھا۔
رومی نے بتایا کہ اُن کا بہترین ڈائیلاگ وہ تھا کہ جب مہوش اُن سے ملاقات کے لیے اسکول پہنچیں اور وہ اپنے والد دانش کے ساتھ بورڈنگ اسکول پہنچے تھے۔
انہوں نے بتایا کہ گھر سے نکلوں تو لوگ پاس آکر تصاویر بنوانے کی خواہش کا اظہار کرتے ہیں، اسی وجہ سے مجھے ٹوپے والی جرسی پہن کر نکلنا پڑتا ہے تاکہ کوئی پہچان نہ سکے۔
انٹرویو کے دوران اینکر نے متعدد بار ڈرامے کی اگلی قسط اور اختتام کے حوالے سے پوچھنے کی کوشش کی تو رومی نے بتایا کہ انہوں نے اگلی قسطوں کے بارے میں ابھی تک اپنے والدین کو بھی نہیں بتایا اور نہ وہ قسط نشر ہونے سے پہلے کسی کو بتائیں گے۔
یہ بھی پڑھیں: ’میرے پاس تم ہو‘ کا ٹائٹل سانگ کم عمر طالب علموں کی خوبصورت آواز میں، ویڈیو وائرل
سیش سجاد گل ڈائریکٹر اور پروڈیوسر سجاد گل کے صاحبزادے ہیں جو اس سے قبل کئی کمرشل میں کام کرچکے جبکہ اُن کے یوٹیوب چینل پر 72 ہزار سے زائد فالوورز ہیں اور وہ ابھی تیسری جماعت میں پڑھ رہے ہیں۔
