اے آر وائی ڈیجیٹل کے ڈرامہ سیریل ’میرے ہمسفر‘ میں حمزہ (فرحان سعید) کے ہالا (ہانیہ عامر) سے نکاح کرنے پر کزن ثمین (زویا ناصر) آبدیدہ ہوگئی۔
اے آر وائی ڈیجیٹل پر گزشتہ دنوں میرے ہمسفر کی 12ویں قسط نشر کی گئی جس میں حمزہ اور ہالا نکاح کے بعد گھر میں آتے ہیں تو والدین کی جانب سے حمزہ پر ہالا کو چھوڑنے کے لیے دباؤ ڈالا جاتا ہے لیکن حمزہ اپنے والدین (صبا حمید) اور (وسیم عباس) کو صاف انکار کردیتا ہے۔
ایک سین میں حمزہ کی کزن ثمین اپنی والدہ کے سامنے حمزہ اور ہالا کے نکاح ہونے پر آبدیدہ ہوگئیں کیونکہ وہ توقع کررہی تھیں کہ حمزہ ان سے شادی کرے گا۔
ثمین روتے ہوئے کہتی ہیں کہ امی کیا واقعی حمزہ نے ہالا سے نکاح کرلیا ہے، والدہ کہتی ہیں کہ ان کا نام نہیں لو، اس پر ثمین کہتی ہیں کہ کیوں نام نہیں لوں ان دونوں کے نام اب جڑ جو گئے ہیں۔
والدہ کہتی ہیں کہ ان کے نام نہیں جڑے ہیں تم اپنی تائی کو نہیں جانتیں وہ مر جائیں گے یا مار دیں گے۔
ثمین کہتی ہیں کہ میں خود کو زندہ دفن محسوس کررہی ہوں، حمزہ نے مجھے کیوں چھوڑ دیا امی میں مر جاؤں گی۔
دوسری جانب ہالا اپنی ساس اور حمزہ کی والدہ کے ظلم و ستم کو یاد کرکے افسردہ ہوجاتی ہیں کہ کس طرح انہوں نے ہالا کو گھر سے نکال دیا تھا۔
کیا حمزہ اور ہالا کو گھر والے قبول کرلیں گے یا پھر ہالا کی زندگی مزید اجیرن ہوجائے گی، یہ سب جاننے کے لیے ڈرامہ سیریل میرے ہمسفر کی 13ویں قسط دیکھنا نہ بھولیں۔
