اے آر وائی ڈیجیٹل کے ڈرامے صنف آہن سے اداکاری کا آغاز کرنے والی ماڈل و اداکارہ میرب علی نے عاصم اظہر سے متعلق خبروں پر خاموشی توڑ دی۔
ماڈل و اداکارہ میرب علی نے ایک ویب سائٹ سے گفتگو کرتے ہوئے کہا کہ عاصم اظہر ان کے سوتیلے بھائی ہیں اور نہ ہی ان کے کزن ہیں۔
ایک سوال کے جواب میں میرب علی نے بتایا کہ ان کی زیادہ تر زندگی بیرون ملک گزری ہے لیکن پروفیشنل کیریئر کا آغاز ملک سے ہی کیا اور انہیں یقین ہے کہ عمر کے حساب سے بہترین کردار مل جائیں گے۔
View this post on Instagram
خیال رہے کہ رواں برس جولائی میں سوشل میڈیا پیجز اور شوبز ویب سائٹس پر خبریں پھیلی تھیں کہ میرب علی اور عاصم اظہر نے منگنی کرلی، ان کی منگنی کی خبریں اس وقت پھیلنا شروع ہوئی تھیں جب کہ عاصم اظہر اور ہانیہ عامر کے درمیان اختلافات کی خبریں سامنے آئی تھیں۔
میرب علی نے بتایا کہ انہوں ںے 2016 میں محض 16 سال کی عمر میں ماڈلنگ شروع کی تھی اور سب سے پہلے گلوکار سجاد علی کے گانے میں پرفارمنس دی۔
View this post on Instagram
اداکارہ کے مطابق انہیں سوشل میڈیا اسٹار اور خصوصی طور پر انسٹاگرام انفلوئنسر کے طور پر پہچانا جاتا ہے تاہم وہ خود کو ماڈل و اداکارہ کے طور پر دیکھتی ہیں۔
انہوں نے بتایا کہ ’صنف آہن‘ کی پروڈیوسر ثنا شاہنواز نے عاصم اظہر کی والدہ گل رعنا کو کہا تھا کہ میرب علی کا چہرہ یمنیٰ زیدی سے ملتا جلتا ہے، اس لیے وہ انہیں ڈرامے میں کاسٹ کرنا چاہتی ہیں اور پھر انہوں نے ہی ڈرامے کے آڈیشن کے لیے رابطہ کیا۔
View this post on Instagram
میرب علی نے بتایا کہ ثنا شاہنوار نے ہدایت کار ندیم بیگ کے سامنے آڈیشن دینے کا کہا جس کے بعد ہی انہیں کاسٹ کیا گیا اور انہوں نے شوٹنگ کے دوران نہ صرف ہدایت کار بلکہ یمنیٰ زیدی سمیت دیگر کاسٹ سے بہت ساری چیزیں بھی سیکھیں۔