کراچی : محکمہ موسمیات نے کراچی میں کل تیز ہواؤں اور گرج چمک کیساتھ تیز بارش کا امکان ظاہر کردیا ہے تاہم بارش کا یہ اسپیل زیادہ طویل نہیں ہوگا۔
تفصیلات کے مطابق محکمہ موسمیات کا کہنا ہے کہ بحیرہ عرب میں دوبارہ لو پریشر ایریا سامنے آیا ہے، تھرپارکر،ٹھٹھہ اوربدین میں گزشتہ رات تیزبارش ہوئی ، ہوا کے کم دباؤ کے باعث کراچی میں آج رات سے ہلکی بارش کا سلسلہ شروع ہوگا اور کل تیز ہواؤں اور گرج چمک کیساتھ تیز بارش کا امکان ہے۔
ڈائریکٹر محکمہ موسمیات سردار سرفراز کا کہنا تھا کہ کراچی میں بارش کا اسپیل زیادہ طویل نہیں ہوگا، یہ سلسلہ ایک سےڈیڑھ دن تک رہنے کاامکان ہے جبکہ تھرپارکر، بدین، ٹھٹھہ، میرپورخاص اور حیدرآباد میں بارش کا سلسلہ 3 دن تک جاری رہے گا۔
محکمہ موسمیات کے مطابق کراچی میں آج بھی درجہ حرارت38سے 39 ڈگری سینٹی گریڈ تک جاسکتا ہے۔
دوسری جانب لاہور سمیت پنجاب کےمختلف علاقوں میں موسلادھار بارش نے گرمی کا زور توڑ دیا ہے اور بارش کے باعث مختلف علاقے بجلی سے بھی محروم ہوگئے۔
محکمہ موسمیات نے اسلام آباد، بالائی پنجاب، خیبرپختونخوا، زیریں سندھ، کشمیراور گلگت بلتستان میں آندھی اورگرج چمک کے ساتھ بارش کی پیشگوئی کی ہے۔
