کراچی : محکمہ موسمیات نے کل کراچی میں بارش کی پیش گوئی کردی اور کہا آج رات مغربی سسٹم بلوچستان کے راستے سندھ میں داخل ہو گا۔
تفصیلات کے مطابق محکمہ موسمیات نے کراچی میں بارش کی نوید سنا دی ، چیف میٹرولوجسٹ سردار سرفراز کی جانب سے کہا گیا ہے کہ آج رات مغربی سسٹم بلوچستان کےراستےسندھ میں داخل ہو گا، سسٹم کے تحت کل صبح کراچی میں بوندا باندی کا امکان ہے۔
چیف میٹرولوجسٹ کا کہنا تھا کہ کراچی میں تیزبارش کاکوئی امکان نہیں ، کل صبح موسم آبرآلود رہے گا تاہم دن کےاوقات میں مطلع صاف ہوجائےگا
مغربی سسٹم کے تحت سکھر ، بدین ، لاڑکانہ اور جامشورو میں ہلکی بارش کا امکان ہے
دوسری جانب لاہورسمیت پنجاب بھر میں بارش برسانے والا نیا سسٹم داخل ہوگیا ہے، محکمہ موسمیات کا کہنا ہے کہ لاہور، ڈی جی خان، ملتان، گوجرانوالہ، بہاولپور، سیالکوٹ سمیت دیگر شہروں میں تیز بارش کا امکان ہے جبکہ مری میں ایک بار پھر برفباری متوقع ہے
صورتحال کے پیش نظر پی ڈی ایم اے نے متعلقہ اداروں کو ہائی الرٹ رہنے کی ہدایت جاری کردی ہے۔
محکمہ موسمیات نے آئندہ چوبیس گھنٹے کے دوران کوئٹہ، قلات اور ژوب میں بھی گرج چمک کیساتھ بارش کی پیشگوئی کی ہے جبکہ کراچی سمیت ملک کے بیشترعلاقوں میں موسم سرد اور خشک رہنے کی توقع ہے۔
