میسکیوسٹی: میکسیکو میں نیوی کا ہیلی کاپٹرگرکر تباہ ہوگیا جس کے نتیجے میں پانچ اہلکاروں سمیت چھ افراد ہلاک ہوگئے۔
تفصیلات کے مطابق میکسیکو مں مغربی علاقے کے جنگلات میں لگی آگ بجھانے کے دوران ہیلی کاپٹر گر کر تباہ ہوا۔ حادثے میں پانچ نیوی اہل کاروں سمیت چھ افراد ہلاک ہوگئے۔
غیر ملکی خبر رساں ایجنسی کے مطابق میکسیکو کے جنگلات میں لگی آگ پر قابو پانے کیلئے میکسیکن نیوی کا ہیلی کاپٹر بھی امدادی کاموں میں حصہ لے رہے تھے کہ اسی دوران ہیلی کاپٹر آگ کے شعلوں کی لپیٹ اور گرم درجہ حرارت کے باعث حادثے کا شکار ہوا اور گر کر تباہ ہوگیا۔
ہیلی کاپٹر کو حادثہ آبادی سے دور پہاڑی علاقے میں پیش آیا۔ مرنے والوں میں جنگلات کمیشن کا نمائندہ بھی شامل ہے۔ حادثے کا شکار ہونے والے روسی ساختہ ایم آئی 17 ہیلی کاپٹر نے ویلی ورڈی سے اڑان بھری تھی، جس میں دو ہزار پانچ سو لیٹر آگ بجھانے کیلئے پانی موجود تھا۔
بڑے رقبے پر پھیلی آگ کے باعث حادثے کے بعد امدادی کاموں میں مشکلات کا سامنا رہا۔ واقعہ پر متاثرہ خاندانوں سے تعزیت کے اظہار میں میکسیکو کے صدر کا کہنا تھا کہ حادثے میں ہلاک ہونے والے تمام افراد کے اہل خانہ سے دلی ہمدردی اور تعزیت کا اظہار کرتے ہیں۔
واضح رہے کہ کم بارشوں اور سخت موسمی حالات کے باعث میکسیکو کے جنگلات میں لگی آگ پر قابو پانے میں انتہائی دشواری کا سامنا ہے، جنگلات میں لگی آگ کے بادلوں اور دھوئیں سے قریبی آبادیوں اور شہر کی آب و ہوا بھی متاثر ہو رہی ہے۔
دھوئیں کے باعث انتظامیہ اور طبی ماہرین نے لوگوں کو بلا ضرورت گھروں سے باہر نہ نکلنے کی ہدایات اور باہر نکلنے کی صورت میں ماسک پہنچنے کا مشورہ دیا گیا ہے۔
