برلن: جرمن چانسلر انجیلا مرکل نے کہا ہے کہ تارکین وطن کے بحران کا حل یورپی سطح پر مشترکہ حکمت عملی تیار کرنے سے نکلے گا۔
ان خیالات کا اظہار انہوں نے جرمنی کے دارلحکومت برلن میں میڈیا سے گفتگو کرتے ہوئے کیا، بیلجیئم کے دارالحکومت برسلز میں دو روزہ پورپی یونین کی سربراہی کانفرنس ہونے جارہی ہے جس میں جرمن چانسلر بھی شرکت کریں گی۔
برسلز روانہ ہونے سے قبل جمعرات کے دن انہوں نے برلن میں کہا کہ یورپ کو متعدد چیلنجز کا سامنا ہے لیکن مہاجرین کا مسئلہ اس بلاک کے مستقبل کا تعین کرے گا، مسئلہ حل نہ کیا گیا تو آگے سنگین نتائج کا سامنا کرنا پڑسکتا ہے۔
تارکین وطن کے بحران پر یورپی یونین کا ہنگامی اجلاس
خیال رہے کہ یورپی یونین کی دو روزہ سربراہی کانفرنس میں مہاجرین کے بحران کے علاوہ کئی دیگر اہم علاقائی اور عالمی امور پر بھی تبادلہ خیال کیا جائے گا، حال ہی میں اٹلی کی جانب سے مزید تارکین وطن کو اپنے خطے میں داخلے کی اجازت نہ دینے پر بھی گفتگو ہوگی۔
دوسری جانب تارکین وطن سے متعلق فرانسیسی صدر ایمانوئیل میکرون کا گذشتہ دنوں کہنا تھا کہ ایسی یورپی ریاستیں جو مہاجرین کو اپنے خطے میں داخل ہونے کی اجازت نہیں دیتیں ان پر مالیاتی پابندی ہونی چاہیے۔
یورپ میں تارکین وطن کی آمد روکنےکیلئے ترکی اور یورپی یونین کے درمیان معاہدہ
انہوں نے یہ بھی کہا تھا کہ مہاجرین کو قبول نہ کرنے والی خود غرض ریاستیں ہیں جو صرف اپنا مفاد دیکھتی ہیں، یورپی یونین سے مکمل مراعات حاصل کرنے والی تمام ریاستوں کو یونین کی مشترکہ پالیسی پر عمل کرنا ہوگا۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
