حکومت کا 2 روزہ ختمِ نبوّت عالمی کانفرنس کرانے کا فیصلہ -
The news is by your side.

Advertisement

حکومت کا 2 روزہ ختمِ نبوّت عالمی کانفرنس کرانے کا فیصلہ

اسلام آباد: وزیرِ اعظم عمران خان نے علما اور مشائخ کے ساتھ خود رابطے میں رہنے کا فیصلہ کر لیا، انھوں نے کہا کہ جلد دو روزہ ختم نبوت عالمی کانفرنس منعقد کی جائے گی۔

تفصیلات کے مطابق وزیرِ اعظم عمران خان سے وفاقی وزیرِ مذہبی امور نور الحق نے ملاقات کی، نور الحق نے وزیرِ اعظم کو ملک کی موجودہ صورتِ حال پر بریفنگ دی۔ وزیرِ اعظم نے کہا کہ مدینے کے طرز پر ریاست کے قیام کے لیے علمائے کرام کی مشاورت ضروری ہے۔

وزیرِ اعظم کا 12 ربیع الاوّل شایان شان طریقے سے منانے کا اعلان

وزیرِ مذہبی امور کے ساتھ ملاقات میں وزیرِ اعظم عمران خان نے کہا کہ ہم پُر امن اسلام کے تصور کو دنیا کے سامنے پیش کرنا چاہتے ہیں۔

دریں اثنا وزیرِ اعظم نے 12 ربیع الاوّل شایان شان طریقے سے منانے کا اعلان کر دیا، ان کا کہنا تھا کہ 12 ربیع الاوّل کے سلسلے میں صوبوں کو ہدایات جاری کر دی گئی ہیں۔

اس موقع پر وفاقی وزیرِ مذہبی امور نے کہا کہ اسلام آباد میں 2 روزہ ختمِ نبوّت عالمی کانفرنس میں علمائے اکرام حضورﷺ کی سیرتِ مبارکہ پر روشنی ڈالیں گے۔


یہ بھی پڑھیں:  لوگوں سے عہد کیا ہے پاکستان کو مدینہ کی ریاست بناؤں گا ،عمران خان


نور الحق قادری نے کہا کہ امامِ کعبہ، جامعہ الازہر کے وائس چانسلر اور مختلف ممالک کے علما کانفرنس میں شریک ہوں گے، عراق اور تیونس کے علمائے کرام بھی آئیں گے۔

وزیرِ مذہبی امور کا کہنا تھا کہ اتحادِ امّت اور بین المذاہب ہم آہنگی کی مہم کو تیز کیا جائے گا، تحقیقی اور تصنیفی کام کو حکومتی سرپرستی میں فروغ دیا جائے گا۔

Comments

comments

یہ بھی پڑھیں