گوجرانوالہ: پنجاب کے شہر گوجرانوالہ میں گھر کے باہر کھڑے 3 سالہ بچہ کتے کے کاٹنے سے زخمی ہوگیا۔
اے آر وائی نیوز کی رپورٹ کے مطابق پنجاب کے شہر گوجرانوالہ میں گھر کے باہر کھڑے کمسن بچے کو کتے نے بری طرح بھنبھوڑ ڈالا۔کتے کے کاٹنے سے زخمی ہونے والے بچے احمد کو تشویش ناک حالت میں اسپتال منتقل کردیا گیا۔
اہل علاقہ کا کہنا ہے کہ کئی مرتبہ انتظامیہ کو کتا مار مہم کے لیے درخواست کی گئی لیکن اس پر کوئی عمل نہیں کیا گیا، اس سے قبل بھی کتے کے کاٹنے سے بچوں کے زخمی ہونے کے واقعات رونما ہوچکے ہیں۔
بچے کو کتے کے کاٹنے کی سی سی فوٹیج سامنے آگئی، تصاویر میں دیکھا جاسکتا ہے کہ بچہ گھر کے باہر کھڑا ہے اچانک اس پر کتا حملہ کردیتا ہے، بچہ لیٹ جاتا ہے جس کے بعد وہ چلا جاتا ہے اور بچہ فوراً اٹھ کر بھاگ جاتا ہے۔
مزید پڑھیں: کتے کے کاٹنے سے بچی جاں بحق، وزیراعلیٰ سندھ نے نوٹس لے لیا
یاد رہے کہ رواں سال فروری میں صوبہ سندھ کے شہر سیہون میں کتے کے کاٹنے سے بچی جاں بحق ہوگئی تھی، وزیراعلیٰ سید مراد علی شاہ نے معاملے کا نوٹس لیا تھا۔
ڈی سی جامشورو نے مراد علی شاہ کو معاملے کی بریفنگ دی کہ واقعے کے بعد بچی کے والدین اسے اسپتال نہیں لے گئے جس کے باعث ہلاکت ہوئی، بچی اپنے گاؤں میں ہی جاں بحق ہوئی۔
یاد رہے کہ گزشتہ سال دسمبر میں لاڑکانہ میں کتے کے کاٹے سے شدید زخمی 6سالہ حسنین جان کی بازی ہار گیا تھا، وہ کراچی کے اسپتال این آئی سی ایچ میں زیر علاج تھا۔ ڈاکٹرز کا کہنا تھا کہ انفیکشن بڑھنے کی وجہ سے حسنین صحتیاب نہ ہوسکا۔
