The news is by your side.

Advertisement

ٹیسٹ ٹیم کے کپتان مصباح الحق کا ریٹائرمنٹ کا اعلان

لاہور: قومی کرکٹ ٹیم کے ٹیسٹ کپتان مصباح الحق نے ویسٹ انڈیز کے خلاف سیریز کے بعد بین الاقوامی کرکٹ سے ریٹائر ہونے کا اعلان کردیا۔

تفصیلات کے مطابق قومی کرکٹ ٹیم کے کپتان مصباح الحق نے ریٹائرمنٹ کا اعلان کردیا۔ میڈیا سے گفتگو کرتے ہوئے ان کا کہنا تھا کہ ویسٹ انڈیز کے خلاف سیریز کیریئر کی آخری سیریز ہوگی۔

انہوں نے اس تاثر کو مسترد کردیا کہ وہ کسی دباؤ کے تحت یہ فیصلہ کر رہے ہیں۔

مصباح الحق کا کہنا تھا کہ تیاری اچھی ہے، کوشش ہے کہ سیریز اور کیریئر کا اچھا اختتام کروں۔

انہوں نے اعتراف کیا کہ گزشتہ 2، 3 میچز میں اچھی کارکردگی نہیں دکھا سکے۔ کوشش ہے کہ یہ سیریز اچھی کھیلیں اور جیتیں۔ ناکامیوں سے مایوسی تو ہوتی ہے لیکن جدوجہد نہیں چھوڑنی چاہیئے۔

میڈیا سے گفتگو میں مصباح الحق نے پی سی بی کا شکریہ ادا کرتے ہوئے کہا کہ بورڈ نے مجھے اپنے فیصلے کرنے کا موقع دیا، یہ میرے لیے اعزاز کی بات ہے۔

انہوں نے کہا کہ کوشش کروں گا ہائی نوٹ پر کیریئر کا اختتام کروں۔

یاد رہے کہ گزشتہ روز چیئرمین پاکستان کرکٹ بورڈ شہریار خان نے کہا تھا کہ ویسٹ انڈیز کے خلاف ٹیسٹ سیریز کپتان مصباح الحق کی آخری سیریز ہوگی۔ اس بارے میں ان سے پوچھنے کی ضرورت نہیں۔

بیالیس سالہ ٹیسٹ کپتان مصباح الحق کو نیوزی لینڈ، آسٹریلیا اور ویسٹ انڈیز کے خلاف 6 ٹیسٹ میں لگاتار شکست کے بعد سے تنقید کا نشانہ بنایا جارہا تھا۔

اس سے قبل مصباح الحق نے ڈھلتی عمر کے تاثر کو مسترد کرتے ہوئے کہا تھا کہ وہ پاکستان سپر لیگ کے دوسرے سیزن میں اپنی فٹنس کا جائزہ لینے کے بعد فیصلہ کریں گے، تاہم مارچ میں پاکستان کرکٹ بورڈ نے اس بات کا اعلان کیا کہ مصباح ہی دورہ ویسٹ انڈیز میں ٹیسٹ ٹیم کی قیادت کریں گے۔

مصباح الحق کا سفر

مصباح الحق نے سنہ 2001 میں نیوزی لینڈ کے خلاف آکلینڈ ٹیسٹ سے اپنے کرکٹ کیرئیر کا آغاز کیا تھا۔ انہوں نے 72 ٹیسٹ میچز کی 126 اننگز میں 4 ہزار 951 رنز بنائے، جس میں 10 سنچریاں اور 36 نصف سنچریاں شامل ہیں۔

انہوں نے 162 ایک روزہ میچز اور 39 ٹی 20 میچز کھیلے۔ ایک روزہ میچز میں انہوں نے 5 ہزار 122 اور ٹی 20 میچز میں 788 رنز بنائے۔

مصباح الحق کو وزڈن کرکٹرز آف دی ایئر 2017 میں دنیا کے 5 بہترین کھلاڑیوں میں بھی شامل کیا جا چکا ہے۔

Print Friendly, PDF & Email

Comments

comments

یہ بھی پڑھیں