The news is by your side.

Advertisement

ٹیم پرفارم نہیں کرے گی تو عہدہ چھوڑ دوں گا، مصباح الحق

لاہور: قومی کرکٹ ٹیم کے ہیڈ کوچ اور چیف سلیکٹر مصباح الحق نے کہا ہے کہ ٹیم پرفارم نہیں کرے گی تو عہدہ چھوڑ دوں گا ایسا نہیں ہے میں بیٹھا رہوں اور ٹیم برباد ہوجائے۔

تفصیلات کے مطابق قومی کرکٹ ٹیم کے ہیڈ کوچ اور چیف سلیکٹر مصباح الحق نے لاہور میں نیوز کانفرنس کرتے ہوئے کہا کہ میرے پاس کوئی جادو کی چھڑی نہیں ہے جو تمام چیزیں فوری طور پر ٹھیک کردوں، صرف کھلاڑی نہیں میں بھی جوابدہ ہوں۔

مصباح الحق کا کہنا تھا کہ پورے ملک میں ایسا تاثر جارہا ہے کہ شاید قومی ٹیم کے سارے فیصلے میرے اکیلے کے ہوتے ہیں لیکن حقیقت میں ایسا نہیں ہے، کرکٹ بورڈ میں 6 سلیکٹرز ہیں جن کے مشورے سے ٹیم سلیکٹ ہوتی ہے۔

مزید پڑھیں: سری لنکا کے خلاف ٹیسٹ سیریز: 16 رکنی قومی اسکواڈ کا اعلان

چیف سلیکٹر نے کہا کہ 10 سال کے بعد پاکستان میں ٹیسٹ کرکٹ کی واپسی خوش آئند ہے، ہم ٹیم میں بہت زیادہ تبدیلی نہیں چاہتے اور ٹیم میں وہ تبدیلیاں کی ہیں جنہیں ضروری سمجھا، فواد عالم پچھلے کئی سالوں سے پرفارم کررہا ہے امید ہے کھلاڑی عمدہ کارکردگی دکھانے میں کامیاب رہیں گے۔

مصباح الحق کا کہنا تھا کہ ایمانداری میرے لیے شرط اول ہے، ٹیم میں بہتری لانے کی کوشش کرتا ہوں، نوجوانوں کی ٹیم بنانے میں وقت درکار ہے۔

ایک سوال کے جواب میں مصباح کا کہنا تھا کہ کرکٹ کو ٹھیک کرنے آیا ہوں اور اگر نہ کرسکا تو خود عہدہ چھوڑ کر چلا جاؤں گا، عہدے سے چمٹے رہنے کا شوق نہیں ہے، میں عہدے سے چمٹا رہوں اور پاکستان کرکٹ کا ستیا ناس ہوجائے۔

Comments

یہ بھی پڑھیں