اپنے کیرئیر کا اختتام یادگار بنانا چاہتا ہوں، مصباح الحق -
The news is by your side.

Advertisement

اپنے کیرئیر کا اختتام یادگار بنانا چاہتا ہوں، مصباح الحق

لاہور : قومی ٹیسٹ کرکٹ ٹیم کے کپتان مصباح الحق نے طویل دورانیہ کی کرکٹ سے ریٹائرمنٹ کا فیصلہ انگلینڈ کی سیریز میں کارکردگی سے مشروط کردیا۔ ان کا کہنا ہے کہ کیرئیر کا اختتام یادگار بنانا چاہتا ہوں۔

ان خیالات کا اظہار انہوں نے قذافی اسٹیڈیم لاہور میں میڈیا سے بات چیت کرتے ہوئے کیا،مصباح الحق کا کہنا تھا کہ وہ بھارت کے خلاف کھیل کر رخصت ہونا چاہتے ہیں تاہم پاک،بھارت سیریز کا امکان نظر نہیں آتااس لئے اگلے دو ماہ ان کےلئے بے حد اہم ہیں۔

انہوں نے کہا کہ وہ یواے ای میں انگلینڈ کے خلاف سیریز کے بعد ریٹائر ہوسکتے ہیں اور وہ اپنے کیریئر کو انگلینڈ کے جوابی دورے تک توسیع دینے پر بھی غور کررہے ہیں۔

کپتان مصباح الحق نے کہا کہ انگلینڈ کی ٹیم کو کسی طور بھی آسان حریف تصور نہیں کرسکتے، انگلینڈ کے خلاف سیریز کے بارے میں پاکستانی کپتان نے کہا کہ دوہزاربارہ میں انگلش ٹیم کو وائٹ واش کرنے پر ہم کسی غلط فہمی کا شکار نہیں ہوں گے۔

اظہرعلی، اسدشفیق اور یونس خان کے ساتھ ہماری بیٹنگ بہت مضبوط ہے۔فاسٹ اور اسپن دونوں طرز کے بہترین بولرز بھی ٹیم میں موجود ہیں اس لئے ہم عمدہ پرفارمنس کیلئے پراعتماد ہیں تاہم ایشز سیریز کی فاتح انگلش ٹیم کوکمزور سمجھنا بڑی غلطی ہوگی۔

ان کا کہناتھا کہ انگلینڈ کے خلاف میچ میں سعید اجمل کی کمی ضرور محسوس ہوگی لیکن یاسر شاہ اور ذوالفقار بابر کی عمدہ کارکردگی نے بڑی حد تک ان کا خلا پورا کردیا ہے۔

ٹیسٹ کپتان کا کہناتھا کہ انگلینڈ کی سیریز کے بعد ریٹائرمنٹ کے حوالے سے کوئی حتمی فیصلہ کریں گے.

یاد رہے کہ پاکستان اور انگلینڈ کے درمیان ٹیسٹ سیریز کا آغازیو اے ای میں تیرہ اکتوبر سے ہوگا.

Comments

comments

یہ بھی پڑھیں